Индустриското производство во еврозоната падна повеќе од очекуваното во октомври, што може да биде знак за рецесија. Сезонски приспособеното индустриско производство е намалено за 0,7 отсто во еврозоната и за 0,5 отсто во Европската Унија (ЕУ) во однос на септември 2023 година, според процените на Евростат објавени во средата.
Нивото на индустриското производство во еврозоната е најниско од 2020 година, додека месечниот пад е поголем од 0,3 отсто, колку што очекуваа економистите анкетирани од „Блумберг“.
Bloomberg
Во однос на октомври 2022 година, индустриското производство е намалено за 6,6 отсто во еврозоната и за 5,5 отсто во Европската Унија.
Во еврозоната производството на капитални производи во октомври е намалено за 1,4 отсто на месечно ниво, на нетрајни производи за широка потрошувачка за 0,6 отсто, додека производството на трајни производи за широка потрошувачка е зголемено за 0,2 отсто, а на енергија за 1,1 отсто.
Во ЕУ производството на капитални производи е намалено за 0,9 отсто, на нетрајни производи за широка потрошувачка за 0,5 отсто, додека производството на трајни производи за широка потрошувачка е зголемено за 0,3 отсто, а на енергија за 2,2 отсто.
Најголем месечен пад на индустриското производство, за седум отсто, е забележан во Ирска. Следуваат Малта со пад од 2,5 отсто и Холандија со пад од 2,1 отсто.
Сите пет најголеми европски економии забележаа месечен пад на производството.
Евростат
Највисок октомвриски раст е забележан во Грција, од шест отсто, во Португалија од 3,8 отсто и во Чешка од 2,9 отсто.
Во еврозоната производството на капитални добра е намалено за 9,7 отсто на годишна основа во октомври. Производството на нетрајни производи за широка потрошувачка падна за 7,8 отсто, на трајни производи за широка потрошувачка за 6,2 отсто, а на енергија за 0,5 отсто.
На ниво на цела ЕУ, годишниот пад на индустриското производство е нешто помалку изразен. На годишно ниво, производството на капитални производи е намалено за осум отсто, на трајни производи за широка потрошувачка за седум отсто и на нетрајни производи за широка потрошувачка за 5,2 отсто, додека производството на енергија е зголемено за 0,3 отсто.
Најголем годишен пад е забележан во Ирска, од 34 отсто, во Естонија од 12,2 отсто и во Холандија од 11,1 отсто. Најголем раст е забележан во Грција, од 10,8 отсто, во Данска од 6,9 отсто и во Словачка од 4,4 отсто.
.webp){kind=icon}
Во моментов нема коментари за веста. Биди прв да коментира...