Француската влада понуди да плати околу 9,7 милијарди евра (9,9 милијарди долари) за целосно национализирање на Electricite de France SA (ЕДФ), во обид да ги реши проблемите во генераторот на електрична енергија што ја влошуваат енергетската криза во Европа.
Државата ќе понуди 12 евра по акција за стекнување на 16 отсто од ЕДФ што сега не ги поседува, се вели во соопштението на француското Министерство за финансии објавено денеска. Тоа е премија од 53 отсто во однос на завршната вредност од 7,84 евра за акциите на ЕДФ на 5 јули, ден пред француската премиерка, Елизабет Борн, да ја објави национализацијата.
Акциите на компанијата, кои беа суспендирани од 13 јули во очекување на детали за планот, скокнаа за 15 отсто на 11,75 евра до 9:10 часот во Париз.
„Цената е на високо ниво, земајќи ги предвид пазарните услови“, рече Грегори Лафит, аналитичар во Tradition. Повеќето проценки за понудената цена се движеа од 10,50 до 12,50 евра, рече тој.
Bloomberg
Во екот на најтешката енергетска криза во Европа во една генерација, Франција сака да го врати оптоварениот од долгови ЕДФ во целосна државна сопственост со цел да ги држи под контрола сметките за електрична енергија на домаќинствата додека прави огромни инвестиции за да ја намали зависноста на земјата од увезени фосилни горива.
Постојните реактори на претпријатието страдаат од влошена состојба, додека изградбата на нови капацитети е спречена од доцнење и пречекорување на трошоците. Оваа лоша ситуација, во комбинација со владината граница на цената на електричната енергија, направи долгот на ЕДФ да изгледа сè понеодржлив.
Национализацијата може да ги увери доверителите на ЕДФ за финансиската стабилност на компанијата, но ќе остави многу други предизвици за наследникот на претседателот и главен извршен директор Жан-Бернард Леви, кој има 67 години и ќе се повлече во септември.
На имателите на конвертибилен долг на компанијата ќе им бидат понудени 15,64 евра за секоја обврзница, се вели во соопштението. Понудата ќе биде доставена до Autorite des Marches Financiers до почетокот на септември.
.webp){kind=icon}
