text size
Грчката влада наскоро планира да го зголеми минималниот износ што потенцијалните странски купувачи на недвижен имот во области со високи цени за изнајмување мора да го платат за да добијат златна виза, изјави во петокот премиерот, Киријакос Мицотакис.
„Разговараме за дополнително зголемување на прагот за сите области каде што има значителен притисок за изнајмување“, рече Мицотакис пред пратениците во Атина.
Грција веќе го удвои износот потребен за добивање грчка виза преку инвестиции во недвижности во популарните дестинации како Атина и Солун, како и на островите Миконос и Санторини. Во тие места, инвеститорите треба да потрошат најмалку 500.000 евра за пристап до таканаречената програма за златни визи. Во останатиот дел од земјава прагот и натаму е 250.000 евра.
Иако премиерот не ја прецизираше висината на претстојното поскапување, тој рече дека во градовите и островите каде притисокот врз пазарот на станови е силен, прагот може да се искачи до 800.000 евра. Во областите каде што кириите се стабилни, сумата би можела да остане на сегашното ниво од 250.000 евра.
Bloomberg
Од воведувањето на програмата за златна виза во 2013 година, Грција примила повеќе од 25.100 апликации и доделила 17.184 дозволи за купувачите кои сакаат да живеат во земјата. Кинеските инвеститори учествуваат со речиси 60 отсто од сите издадени визи, а околу седум отсто од инвеститорите се од Турција.
Од своето основање, програмата ги зголеми државните приходи за повеќе од две милијарди евра, рече Мицотакис.
Цените на станбените недвижности во Атина драстично се зголемија во последните години, делумно благодарение на странскиот интерес, закрепнувањето на грчката економија и нискиот праг за златната виза. Ова, пак, доведе до зголемување на цените за изнајмување. Индексот на цените во главниот грчки град пораснал за 11,9 отсто во третиот квартал од 2023 година во споредба со истиот период пред една година, покажуваат податоците на Банката на Грција. Уште поголеми зголемувања беа забележани во претходните квартали.
Туристичкиот бум, исто така, им отежна на локалните жители да најдат место за живеење, бидејќи сопствениците се свртеа кон краткорочно изнајмување на нивните домови преку платформи како што е „Ербиенби“ (Airbnb). За да се справи со ситуацијата, владата минатата година воведе програма со која се доделуваат ниски или без каматни заеми на лица помлади од 39 години кои сакаат да го купат својот прв имот.
.webp){kind=icon}
