.webp){kind=icon}
Инфлацијата во Германија забрза за првпат од декември, што се совпаѓа со предупредувањата на Европската централна банка (ЕЦБ), која очекува дека ќе има проблеми за враќање на посакуваната инфлација од два отсто.
Растот на цените достигна 2,4 отсто во април, додека економистите анкетирани од „Блумберг“ (Bloomberg) очекуваа тој да остане стабилен на 2,3 отсто. Цените на енергијата беа клучниот двигател на растот на инфлацијата.
Априлската инфлација беше слична во Шпанија, каде што инфлацијата се искачи на 3,4 отсто откако владата продолжи да ја отстранува поддршката што помогна да се задржaт зголемените трошоци за енергија. Во меѓувреме, растот на цените во Ирска падна на 1,6 отсто од 1,7 отсто.
Податоците за инфлацијата за дваесетчлената еврозона се очекува да покажат непроменета бројка од 2,4 отсто за првпат годинава. Сепак, веројатно е дека ќе има уште едно забавување на базичната инфлација, што ги исклучува цените на енергијата и на храната.
Охрабрени од повлекувањето на инфлацијата од двоцифрениот врв во 2022 година, претставниците на ЕЦБ се подготвуваат за првото намалување на трошоците за задолжување во јуни. Колку олеснувања ќе донесе годинава е прашање на дебата, а малкумина се осмелуваат да дадат конкретни предвидувања бидејќи изгледите сè уште се неизвесни.
Креаторите на политиките се особено фокусирани на цените на домашните услуги, каде што растот остана тврдоглав во последните месеци. Тоа беше силно поттикнато од платите, кои се зголемија со забрзано темпо за да ги компензираат зголемените трошоци за живот.
