.webp){kind=icon}
Економското расположение во еврозоната падна на најниско ниво во последните седумнаесет месеци поради стравувањата од недостиг на енергија, кој е присутен и кај домаќинствата и кај компаниите. Одлуката на Европската централна банка (ЕЦБ) да ги зголеми референтните каматни стапки за првпат по една деценија ги зголеми стравувањата дека се приближува рецесија.
Индексот на Европската комисија во јули падна на 99 поени, додека во јуни беше 103,5 поени. Бројката од јули беше далеку под нивото од 102 поена предвидено од аналитичарите.
Расположението кај потрошувачите забележа најголем пад и е на најниско ниво откако овие податоци се следени и евидентирани. Загриженост за намалување на економската активност е забележана во 11 од 19 членки на еврозоната, што е најлош резултат од почетокот на пандемијата на коронавирусот.
Пад на оптимизмот е забележан во сите сектори, но најголем пад е забележан во секторот индустрија и услуги. Малопродажбата и градежништвото забележаа нешто помало влошување на економското расположение.
Bloomberg
Европа е на работ поради одлуката на Русија да одговори на западните санкции со намалување на испораките на природен гас. Целосен прекин на испораките би го намалил производството, бидејќи компаниите би биле принудени да го ограничат обемот. Дури и пред зимата, економскиот раст нагло забави во вториот квартал, судејќи според прогнозите за податоците кои ќе бидат објавени в петок.
Еврозоната полека влегува во рецесија која ќе трае до крајот на годината, соопшти компанијата „Голдман Сакс“, чии економисти се повикуваат на крај на економското закрепнување и политичките превирања во Италија.
Инфлацијата, сепак, помалку ги загрижува потрошувачите, се вели во соопштението објавено денеска. Нивните очекувања за инфлација паднаа на најниско ниво од почетокот на војната во Украина, иако може да се очекува инфлацијата да достигне нов рекорд во јули.
Како одговор, ЕЦБ минатата недела се откажа од негативните каматни стапки по осум години, зголемувајќи ги трошоците за задолжување за неочекувани 50 базични поени.
