Германската економија се намали повеќе од очекуваното

Германската економија се намали повеќе од првичната процена во вториот квартал, поради значително послабите резултати на производителите откако американските компании на почетокот од годината го зголемија бизнисот за да избегнат царини.

Бруто-домашниот производ падна за 0,3 отсто во однос на претходните три месеци, соопшти денеска националната статистичка служба, ревидирајќи ја првичната процена за пад од 0,1 отсто. Инвестициите исто така имаа силно негативно влијание, со пад од 1,4 отсто, додека приватната потрошувачка обезбеди многу помала поддршка од првичните очекувања.

„Индустриското производство, особено, беше послабо од тоа што се претпоставуваше во претходниот период“, наведе агенцијата во соопштение.

 

Германското производство се намали повеќе од очекуваното во вториот квартал

 

Bloomberg

Падот е удар за најголемата европска економија, уривајќи ги надежите дека наскоро ќе излезе од двегодишната рецесија што следуваше по војната на Русија против Украина. БДП порасна за 0,3 отсто во првите три месеци од 2025 година, но тоа делумно се должеше на предвременото зголемување на извозот кон САД.

„Економијата се соочи со пресврт на ефектот од предвремениот извоз и со првите целосни последици од американските царини“, напиша Карстен Бржески, глобален шеф за макроекономија во ИНГ (ING), во извештај до клиентите.

„Германската економија премногу се навикна на стагнација и можно е дури следната година да започне посуштествено закрепнување.“

Во јули Европската Унија постигна договор со претседателот Доналд Трамп, според кој повеќето пратки од регионот ќе бидат опфатени со давачки од 15 отсто, зделка што беше остро критикувана од германската индустрија.

Економијата исто така страда и од слаб глобален раст, геополитичка неизвесност и долгогодишни проблеми како стареење на работната сила и прекумерна бирократија.

„Бундесбанк“ (Bundesbank) во четвртокот предупреди во својот месечен извештај дека БДП можеби повторно нема да забележи раст во третиот квартал, при што стагнацијата е најверојатното сценарио.

Министерката за економија Катерина Рајхе изјави дека податоците од петокот го нагласуваат потребното темпо за повеќе реформи.

„Сега е клучно брзо да се спроведат смели структурни реформи - на пример, со поголема флексибилност на работното време, ограничување на трошоците за труд надвор од платите, намалување на бирократските пречки и пониски цени на енергијата“, рече таа.

„Даночниот товар за компаниите во Германија веќе е висок. Мора да разговараме за понатамошни намалувања.“

Постои одреден оптимизам од плановите за значително зголемување на трошоците за одбрана и инфраструктура, со ефекти што најверојатно ќе се почувствуваат во 2026 година.

Во почетокот на неделава композитниот индекс на набавки (Purchasing Managers’ Index) на „Ес енд Пи глобал“ (S&P Global) за Германија покажа дека активноста во приватниот сектор неочекувано се забрзала во август, бидејќи тригодишниот пад во производството се приближува кон крај.

„Се очекува германската економија повторно да заживее, пред сè благодарение на силните владини стимулации за инвестиции“, изјави економистот на „Дојче банк“ (Deutsche Bank), Марк Шатенберг. Позитивни импулси се очекуваат и од приватната потрошувачка поради ниската инфлација и стабилниот раст на платите. Дополнително, перцепцијата на неизвесност во економската политика е намалена со трговскиот договор меѓу ЕУ и САД.

Во моментов нема коментари за веста. Биди прв да коментира...

Остави коментар