Француската влада во ризик од нов колапс, пазарите под притисок

Францускиот премиер Франсоа Бајру распиша гласање за доверба што може да ја урне француската влада веќе следниот месец, предизвикувајќи распродажба на француски средства додека инвеститорите се штитат од поголема политичка неизвесност.

Крајно десничарската Национална алијанса, левичарското движење „Непокорена Франција“ и Зелените најавија дека ќе гласаат против предлогот на 8 септември, додека социјалистите порачаа дека нема да ја поддржат владата. Доколку мнозинство пратеници гласаат против Бајру, тој ќе биде принуден да поднесе оставка на својата влада.

Падот на уште една француска влада, откако претходниот премиер Мишел Барние издржа само 90 дена, би ја истакнал кревката позиција на претседателот Емануел Макрон. Неговиот партиски блок и сојузниците ја изгубија парламентарната мнозинска поддршка во 2024 година. Националната алијанса на Марин Ле Пен, која стана најголема партија во долниот дом на парламентот, бара нови избори.

Приносот на десетгодишните француски обврзници се зголеми за девет базични поени и достигна 3,51 отсто, меѓу најпогодените на глобалниот пазар на обврзници. Премијата за задолжување на Франција во однос на Германија се прошири за пет базични поени и достигна 75, највисоко ниво од април, во споредба со 65 на крајот на јули.

Десетгодишните приноси на Франција сега се меѓу највисоките во еврозоната, откако веќе ги надминаа земјите што некогаш беа во срцевината на европската должничка криза, како Грција и Португалија. Движењата во понеделникот ја оставија Франција само осум базични поени под Италија.

Што велат од „Блумберг економикс“

„Опозициските партии изгледа се решени да гласаат против предлогот. Ако не се повлечат, владата ќе падне.“

- Антонио Баросо и Жан Далбар

Кошницата акции на „Барклис“ (Barclays), која ги содржи компаниите што се најизложени на домашни ризици во Франција, вклучувајќи го и државниот буџет, падна за 2,9 отсто во понеделникот.

„Инвеститорите што се свртеа кон Европа со верување дека Германија на некој начин го претставува потенцијалот на еврозоната направија грешка“, изјави Винсент Жувинс, главен инвестициски стратег на ИНГ (ING) во Брисел, во интервју во вторникот.

„Сега имаме Европа со две брзини, со земји како Германија што можат да си дозволат да трошат за раст и други што немаат избор освен да ги консолидираат јавните финансии.“

Bloomberg

Бајру го свикува гласањето за доверба во обид да ја консолидира поддршката откако се соочи со отпор против намалувања на расходите и зголемување на даноците во вредност од 44 милијарди евра (51 милијарда долари), кои тој ги смета за клучни за да се избегне катастрофа за јавните финансии на Франција. Тој исто така предложи укинување на два државни празника, што наиде на подбив од опозицијата.

Бајру изјави дека Макрон се согласил да го свика парламентот на вонредна седница за владата да може да го претстави својот план и да се одржи гласањето за доверба.

„Очигледно е дека ќе гласаме против доверба на владата на Франсоа Бајру“, објави Ле Пен на социјалните мрежи. „Франсоа Бајру очигледно не разбира дека Французите целосно се свесни за економската и финансиската криза во која нашата земја е втурната по осум години макронизaм.“

Внатрешните проблеми на Франција се продлабочуваат додека Макрон се бори и на меѓународната сцена. Минатиот месец францускиот претседател отпатува во Белата куќа заедно со германскиот канцелар Фридрих Мерц и британскиот премиер Кир Стармер, за да го повикаат претседателот Доналд Трамп да застане зад Украина. Истовремено, европските лидери се наоѓаат во средина на жесток трговски спор со САД.

Тензиите во Париз го отвораат прашањето колку уште може да опстане оваа влада и дали Макрон ќе се одлучи за уште едни вонредни парламентарни избори во обид да ја зацврсти својата поддршка.

Следните претседателски избори во Франција се закажани за април или почетокот на мај 2027 година. Единствениот начин да се смени тој термин е доколку Макрон не е во можност да ја извршува својата функција или поднесе оставка, нешто што тој досега изјавил дека нема да го направи пред крајот на својот мандат.

 

Францускиот премиер тоне во анкетите

Бајру е најнепопуларниот премиер во мандатот на Макрон

Bloomberg

Француските трошоци за задолжување се зголемија во однос на другите земји, а земјата сега има најголем буџетски дефицит во еврозоната. На радиото Франс Интер (France Inter) во вторникот, министерот за финансии Ерик Ломбар изјави дека земјата е на добар пат да го исполни дефицитот од 5,4 отсто од БДП за годинава.

Доколку владата падне, Ломбар рече дека трошоците за задолжување на Франција ќе се искачат над оние на Италија „во рок од 15 дена“, додавајќи дека „ќе бидеме навистина последни меѓу 27-те во Европа“.

Бајру во јули го претстави првичниот нацрт на буџетот за 2026 година во обид да обезбеди поддршка за време на летната пауза. Тој намерно не замина на одмор, туку остана претежно во Париз и отвори канал на Јутјуб (YouTube) наречен „ФБ директ“ (FB Direct) за да ги објасни своите одлуки за даноците и трошоците.

Но обидите малку придонесоа за придобивање на јавното мислење, а популарноста на Бајру падна на рекордно ниско ниво за кој било премиер во времето на претседателството на Макрон. Споровите ризикуваат да се прелеат и на улица, бидејќи повикот на социјалните мрежи за „блокирај сè“ на 10 септември доби поддршка од повеќе политички групи.

„Ако патот што ќе го избереме е да се преправаме дека проблемот не постои, нема да избегаме“, рече Бајру.

„Нема да избегаме како држава и како општество, затоа што на коцка се нашата слобода и суверенитет.“