Погледнете ги становите во Париз чија цена е 55 илјади евра по квадратен метар

Луксузната групација што стои зад хотелот „Клариџис“ (Claridge's) пушта на пазарот 23 нови стана во хотелот „Мејбурн Сен-Жермен“ (Maybourne Saint-Germain), ултралуксузен хотел во Париз, кои би можеле да бидат меѓу најскапите домови (по квадратен метар) во градот. Цените на становите започнуваат од околу 6 милиони евра. Ќе бидат сместени во историската зграда Ило Сен-Жермен (Îlot Saint-Germain), која во 17 век била манастир, потоа литературен салон, кој го посетувале Бенџамин Фрeнклин и Волтер, а подоцна зграда на Министерството за одбрана, каде што низ ходниците поминувале многу великани, од Наполеон до Шарл де Гол. Се очекува проектот да биде завршен во 2027 година, а продажбата ќе започне во април годинава.

Рендер со дел од новите резиденции. Извор: Maybourne

Луксузните цени на овие станови изгледаат како да се загарантирани да привлечат внимание. Со цена од околу 55.000 евра по квадратен метар, тие се приближно двојно поскапи од вилите опкружени со дрвја на булеварите во околниот седми арондисман, кои генерално чинат меѓу 25.000 и 30.000 евра по квадратен метар, според податоците на СИР (Sotheby’s International Realty).

„Секако, цената носи и ризик дека никој нема да биде заинтересиран“, вели Роланд Фасел, извршен директор на МХГ (Maybourne Hotel Group). „Ако ја пробиете цената, тоа го поставува проектот на највисоко ниво. Потоа мора да го испорачате најдоброто со најдобрите дизајнери и најдобрите завршни работи“.

Рендер на бања во новите резиденции. Извор: Maybourne

Седум стана дизајнира луксузниот дизајнер Пјер-Ив Рошон, кој работел на проекти како што се „Валдорф Асторија Њујорк“ (Waldorf Astoria New York) и „Емори“ (Emory) во Лондон, додека преостанатите 16 ќе бидат дело на Лора Гонзалез, дизајнерка одговорна за главната продавница на „Картие“ (Cartier) и „Принтемпс“ (Printemps) во Њујорк, која ќе се отвори наскоро. Становите, кои доаѓаат целосно наместени и декорирани, ќе имаат раскошни кујни од мермер, кристални лустери, кади и бронзени арматури.

Становите имаат од една до три спални соби, со можност за купување повеќе стана и спојување во еден голем стан за уште повеќе простор. Купувачите ќе имаат целосен пристап до хотелските содржини, вклучувајќи собна услуга нонстоп, чистење, паркинг, поштенски услуги и хемиско чистење, што Фасел вели дека ќе биде голем мамец за купувачите. Самиот хотел ќе има шест ресторани, вклучувајќи јапонски ресторан и слаткарница, велнес-клуб, клуб за членови и три базени, вклучувајќи и базен на покривот, со должина од 30 метри со поглед на градот, и базен само за станарите.

Рендер од базенот што ќе им биде на располагање на станарите. Извор: Maybourne

Како што „Мејбурн“ (Maybourne) го шири своето хотелско портфолио, Фасел вели дека компанијата донела стратегиска одлука да создаде брендирани резиденции во повеќето од своите нови објекти како дополнителен извор на приходи. Фасел вели дека стратегијата била успешна во „Аман“ – пентхаусот во „Аман Њујорк“ (Aman New York) се продаде за 135 милиони долари минатата година. Тој додава дека гостите на луксузните хотели на „Мејбурн“, вклучувајќи ги „Клариџис“ и „Конаут“ (Connaught), рекле дека сакаат да живеат хотелски живот во целосна смисла.

Рендер од елегантна дневна соба. Извор: Maybourne

Концептот на брендирани резиденции е нов за Париз, вели Александер Крафт, претседател и извршен директор на СИР (Sotheby’s International Realty) Франција-Монако, кој ќе го направи овој проект прв од ваков вид во градот. Тој вели дека се верува дека купувачите главно ќе бидат од странство.

„Веројатно 90 отсто ќе бидат продадени на меѓународни купувачи, веројатно 70 отсто Американци, потоа купувачи од Блискиот Исток и Азија, или можеби некои Французи што сакаат да купат дел од француската историја“, вели Крафт. „Но ова привлекува луѓе што се навикнати на вакви резиденции во Њујорк или во Лондон, каде што веќе постои овој концепт на целосна услуга“. Тој додава дека најсличен концепт нуди „Аман“ во Њујорк, но во францускиот случај не станува збор за блескава кула од стакло и челик, туку за историски значајна зграда во центарот на Париз.

Рендер од главна спална соба во резиденцијата. Извор: Maybourne

Крафт вели дека 23-те резиденции веројатно ќе бидат купени од луѓе што редовно одат во Градот на Светлината поради работа и кои трошат на луксузни хотелски соби: „Ќе привлече космополитски купувачи што обично земаат апартман во големите хотели, како што е хотелот ’Кријон’ или ’Бристол, и кои се воодушевени од концептот дека можат едноставно да дојдат со својата торба во приватен авион и да имаат сè што им е потребно во својот простор, но со хотелски услуги“.

Рендер од соба во резиденцијата. Извор: Maybourne