Британскиот план за чиста енергија ќе отвори 400.000 нови работни места до 2030 година

Напорите на Обединетото Кралство за декарбонизација на својот енергетски систем до крајот на деценијата ќе дадат најголем поттик за вработување во Источна Англија и Шкотска.

Владиниот план објавен денеска предвидува дека овие региони ќе имаат најголема корист од над 400.000 нови работни места што ќе се создадат за поддршка на транзицијата кон енергија со низок јаглероден отисок.

Bloomberg Mercury

 

Водоинсталатери, електричари и заварувачи се меѓу најбараните занимања - со задачи кои се движат од изградба и управување со обновливи инсталации до подобрување на ефикасноста, управување со паметни мрежи и декарбонизација на традиционалните индустрии.

Во Источна Англија се очекува само изградбата на нуклеарниот погон „Сајзвел си“ (Sizewell C) на брегот на Сафолк да создаде 10.000 работни места. Плановите за складирање на јаглерод во Шкотска и североисточна Англија, исто така, треба да поддржат околу 35.000 работни места, според Министерството за енергетска безбедност на Велика Британија.

До 2030 година Лондон може да има 25.000 вработени кои директно ќе бидат ангажирани за чиста енергија, што би било повеќе од двојно во однос на нивоата од 2023 година.

Владата соопшти дека става акцент на финансирање за обука на работници во областите на чиста енергија, бидејќи индустријата честопати посочува на недостастигот на кадар со соодветни вештини. Во извештајот се проценува дека бројот на водоинсталатори и столари до 2030 година ќе се удвои во споредба со нивоата од 2023 година. Кога станува збор за заварувачите, една од најбараните професии, ќе биде потребен тројно поголем број квалификувани работници.