Растот на германската економија ќе забави поради последиците од руско-украинската војна, предвидува германскиот институт IfW од Келн. Експертите од институтот очекуваат дека Бруто домашниот производ (БДП) во текот на годинава и натаму ќе расте, но ќе изнесува 1,4 отсто, што е за 0,7 проценти помалку отколку што се предвидуваше во јуни.
И за следната година институтот ја коригираше својата прогноза за дури 4 проценти и наместо силен раст, очекува дека германската економија ќе се намали за 0,7 проценти.
Се очекува дека германскиот БДП ќе се намалува до третиот квартал од 2023 година, кога се очекува благ раст. За 2024 година IfW предвидува економски раст од 1,7 проценти.
Според прогнозите, инфлацијата следната година ќе биде уште повисока во Германија и ќе изнесува 8,7 проценти, додека очекувањата се дека годинава ќе се заврши со инфлација од 8 отсто.
„Големите увозни цени на енергенсите носат економска лавина кон Германија. Енергетски интензивниот производствен сектор многу тешко ќе биде погоден“, коментира Стефан Котс од Институтот во Келн. Се очекува дека ценовниот притисок дури во 2024 година значајно ќе спласне, кога стапката на раст на цените би била 3,1 отсто.
Скапиот увоз на енергенси ја намалува профитабилноста
Според пресметките, Германија годинава ќе плати околу 123 милијарди евра повеќе за увоз на енергија и 136 милијарди евра повеќе во следната година. Тоа значи дека за толку пари всушност ќе се намали потрошувачката и ќе се намали профитабилноста на енергетски интензивните компании. „Резултатот ќе биде дека германското производство следната година ќе биде за 130 милијарди евра пониско од претходните очекувања“, нотираат од IfW.
Институтот очекува и намалување на куповната моќ на граѓаните за дури 4,1 отсто во следната година, што би било најголем пад во историјата на Германија.
„Германија сега мора да намени значајно голем дел од своите приходи за увоз на енергија. Како резултат на тоа, државата ќе осиромашува. Владата ќе може само да ги прераспределува пакетите помош, но нема да може да ги елиминира“, вели Котс.
Рецесијата, како и зголемувањето на минималната плата на 12 евра по работен час, ќе доведат до тоа да се загуби интензитетот на раст на вработеноста во следните месеци. Се очекува дека стапката на невработеност ќе порасне од 5,3 отсто годинава, на 5,6 проценти во 2023, а потоа ќе се намали за нијанса и во 2024 ќе изнесува 5,5 проценти.
.webp){kind=icon}
Во моментов нема коментари за веста. Биди прв да коментира...