„Визер“ ја проширува базата во Скопје, достапни повеќе дестинации

Авиокомпанијата „Визер“ ја прошири својата база на Меѓународниот Аеродром Скопје со седми авион, што според Владата и „ТАВ Македонија“ претставува значаен чекор за натамошен развој на воздушниот сообраќај, зголемување на поврзаноста на земјата и раст на бројот на патници.

„Седми авион ќе биде дел од базата на ‚Визер‘ во Скопје. Ова е големо достигнување и нешто со што многу национални авиокомпании не можат да се пофалат. Затоа често знам да кажам дека ‚Визер‘ практично стана национален авиопревозник на Македонија - порача денеска од скопскиот аеродром, вицепремиерот и министер за транспорт Александар Николоски и оцени дека станува збор за значајно достигнување за македонското воздухопловство.

Тој посочи дека бројките го потврдуваат растот на авиокомпанијата на македонскиот пазар, наведувајќи дека минатата година „Визер“ превезла 1,7 милиони патници, додека во првите шест месеци од годинава превезла 1,2 милиони патници.

Николоски информираше дека аеродромите во Скопје и Охрид во првата половина од годинава надминале два милиона патници и изрази очекување растот да продолжи и во второто полугодие.

„Ако пред неколку години се боревме за два милиона патници годишно, сега мислам дека и четири милиони патници годишно е нешто што е реално остварливо“, нагласи Николоски.

Тој потсети и на новите авиолинии што се воведени во изминатиот период, меѓу кои летовите до Алгеро и Палермо во Италија, како и линиите од Дортмунд и Катовице кон Охрид.

Генералниот директор на „ТАВ Македонија“, Неџат Курт, рече дека додавањето на седмиот авион претставува потврда на довербата во македонскиот пазар и во долгогодишното партнерство меѓу „ТАВ Македонија“ и „Визер“.

„Овој седми авион е многу повеќе од оперативна одлука. Тој претставува силна потврда на довербата во нашиот пазар и во цврстото партнерство меѓу ‚ТАВ Македонија‘ и ‚Визер‘. Воедно, тоа е јасен сигнал за доверба во иднината на нашиот воздухопловен сектор“, истакна Курт.

Според него, дополнителниот авион ќе овозможи повеќе дестинации, поголем број летови и поголем избор за патниците, а веќе резултирал со отворање на новите линии до Палермо и Алгеро.

Курт нагласи дека позитивните ефекти се чувствуваат и пошироко во економијата преку отворање нови работни места и поддршка на туризмот, транспортот, угостителството и трговијата.

Тој информираше дека во првите шест месеци од 2026 година аеродромите во Скопје и Охрид опслужиле речиси два милиона патници и реализирале повеќе од 13.000 летови, што претставува раст од 28 проценти во патничкиот сообраќај и 7,6 проценти во бројот на летови во споредба со истиот период лани.

„Особено сме горди што, меѓу 15-те аеродроми со кои управува ‚ТАВ Аеродроми‘, ‚ТАВ Македонија‘ бележи највисок раст на бројот на патници во текот на оваа година“, рече Курт.

Тој додаде дека „ТАВ Македонија“ ќе продолжи да инвестира во инфраструктурата, безбедноста, дигитализацијата и квалитетот на услугите, со цел да обезбеди натамошен развој на воздухопловниот сектор во земјата.

Офицерот за развој на авиолинии во „Визер“, Андраш Сабо, порача дека компанијата продолжува да го зголемува своето присуство во Македонија.

„Денес сме тука за да ја потврдиме нашата посветеност кон Македонија и кон македонскиот народ. Пред помалку од една година го најавивме шестиот авион, а денес веќе го потврдуваме и авионот број седум, што значи уште повеќе летови и уште повеќе можности за Македонија“, истакна Сабо.

Со новиот авион, додаде тој, се воведуваат и дополнителни фреквенции на постојните линии, вклучително и до Берлин, Дортмунд и Малме, како и нови авиолинии до Алгеро и Палермо.

 

Според Сабо, во изминатите 12 месеци „Визер“ вовела повеќе од 15 нови конекции со  Македонија, вклучително и летови од Катовице и Вроцлав до Охрид, како и линијата Милано - Охрид. Во летната програма на компанијата се вклучени и нови дестинации од Скопје, меѓу кои Мадрид, Стокхолм, Ларнака, Неапол и Бари.

„Создаваме нова поврзаност, повеќе работни места и поголем економски импакт врз Македонија. Тука сме да прославиме со вас и да ви се заблагодариме за поддршката“, истакна Сабо.

Тој упати благодарност до Владата, Министерството за транспорт и „ТАВ Македонија“ за соработката, оценувајќи ја како плодна и продуктивна и посочи дека токму партнерскиот пристап овозможува континуиран развој на авиосообраќајот во земјата. Оцени дека додавањето на седмиот авион на „Визер“ во базата на Меѓународниот Аеродром Скопје ќе придонесе за натамошно зголемување на воздушната поврзаност на Македонија, развој на туризмот и дополнителен раст на патничкиот сообраќај.