Нов рекорд: Раст на цените на становите од 21,2 проценти

Цените на недвижностите во Македонија во периодот јули-септември, годинава се зголемиле за 21,2 проценти, што е рекорден пораст во изминатавата деценија, покажуваат новите податоци на Народната банка. Станува збор за зголемување од 4,7 проценти во однос на претходниот квартал(април-јуни) кога растот на цените на недвижностите изнесуваше 16,5 проценти.

Продолжи зголемувањето на трошоците во градежништвото

„Блумберг Адриа“ веќе пишуваше дека македонските градежници како главна причина за растот го наведуваат зголемувањето на трошоците за градење. Нивното тврдење го поткрепуваат и статистичките податоци. Имено, растот на трошоците, иако со поумерено темпо, продолжи да се зголемува и во вториот квартал од годинава.

Во второто тримесечје од 2022 година, во споредба со првото тримесечје од 2022 година, трошоците во градежништвото за нови објекти за индивидуално домување се повисоки за 3.8 проценти, трошоците за материјали за 0,2 проценти , а трошоците за вработените се повисоки за 12,5 проценти. Во второто тримесечје од 2022 година, во споредба со второто тримесечје од 2021 година, трошоците во градежништвото за нови објекти за индивидуално домување се повисоки за 20,7 проценти, трошоците за материјали за 19,8 проценти и трошоците за вработените се повисоки за 22,6 проценти.

Се зголемува ранливоста на пазарот

„Блумберг Адриа“ веќе објави дека новите економски трендови носат ризици за македонскиот пазар на недвижности, кои што може да го заразат целокупниот финансискиот систем во државата. Имено. симулацијата за оцена на ранливостите на пазарот на недвижности на Европскиот одбор за системски ризици што ја презентира Народната банка во последниот извештај за финансиската стабилност покажува дека македонскиот пазар на недвижности е умерено поранлив отколку европскиот. 

Ранливостите на домашниот пазар на недвижности главно поттекнуваат од финансиската состојба на домаќинствата, односно пониското ниво на финансиска актива во однос на долгот, што е долгорочна карактеристика на домаќинствата. Истовремено, во 2021 се зголемува учеството на отплатата на долгот во однос на расположливиот доход, што исто така придонесува за поголема чувствителност поврзана со финансиската состојба на домаќинствата. Забрзаниот раст на цените на недвижностите во однос на трендот е дополнителен ризик фактор. На можни ризици упатува и стапката на раст на станбените кредити, којашто во последните неколку години се одржува над прагот на висока ранливост.

„Сепак, и покрај присуството на овие ризици, сè уште не се забележува сериозно кумулирање на ризиците за финансиската стабилност коишто би произлегле од движењата на пазарот на недвижности. Народната банка и во следниот период ќе продолжи со будно следење на состојбите на пазарот на недвижности и на ризиците поврзани со него, а подготвена е и за преземање соодветни макропрудентни мерки, доколку се оцени дека тоа е потребно за зачувување на финансиската стабилност“, потенцираат од Народната банка во извештајот.

Во моментов нема коментари за веста. Биди прв да коментира...

Остави коментар