.webp){kind=icon}
Експертите очекуваат енергетски тешка зима за Македонија. Според електроинженерот Благоја Деспотоски, кој зборуваше за Блумберг Адриа ТВ, малку работи се презеле од лани до сега за да се подобри состојбата во енергетиката.
„Со оглед на фактот дека не извлековме поука од минатата зима, ќе поминеме тешко или многу тешко во зависност од просечните температури оваа зима. Тоа го кажувам заради фактот што имаме неможност од континуирано снабдување со јаглен за термоелектраните во РЕК Битола и РЕК Осломеј, имаме застарена опрема во нашите термоелектрани кои работат 40-тина години и имаме и други ситни проблеми“, вели Благоја Деспотоски.
Електроинженерот со кој разговаравме вели дека потребни се контретни одлуки и чекори за менаџирање со енергетската криза.
„Има многу „ако“. Има АКО има јаглен, а нема, потоа АКО има мазут, а нема мазут, АКО има резервни делови, а нема доволно, АКО Бугарија ни даде струја, АКО Србија ни даде гас итн. Значи, многу „ако“, а тешко дека знаеме како“, вели Деспотоски.
Според него, за оваа зима единствено може да направиме конкретен оперативен план за како да се искористи буквално секоја минута за што поголемо производство на струја, но на долгорочен план предлага формирање на Министерство за енергетика, кое што ќе ги носи сите битни одлуки како за снабдување со суровини, така и за инвестиции во производни капацитети и искористување на постоечките капацитети.
„Долгорочно добро ќе биде да учествуваме во изградба на нуклеарната централа Белене во Бугарија и да имаме континуирано електрична енергија“, вели Деспотоски, кој смета дека политиките во енергетиката мора да се носат во соработка со стручните кадри.
Во видеото погледнете го целиот разговорот на Блумберг Адриа ТВ со електроинженерот Деспотоски.
