Цицонков: Се плашам дека ќе се повтори ланската криза во енергетиката

„Се плашам дека ќе се повтори ланската ситуација со енергетиката во земјава“, смета универзитетскиот професор Ристо Цицонков. Тој во гостувањето во Блумберг Адрија ТВ зборува за очекувањата за претстојната зима и дали Македонија има план и капацитет да се справи со енергетската криза.

„Јас сум разочаран од тоа како Владата ја тера работата на полето на енергетиката. Тоа е страшно неодговорно, иако кажуваат различни приказни дека ќе има доволно струја и греење“, вели професорот од Машинскиот факултет, кој смета дека нема да има доволно електрична енергија од сопствени извори кога ќе почнат студовите и дека Македонија повторно ќе почне да увезува струја од меѓународен пазар по екстремно високи цени.

„Видовме лани кога цената беше многу висока во такви ситуации. Ние лани потрошивме над 200 милиони евра за скапа струја, тоа е како половина хидроцентрала Чебрен. Да ја имавме таа хидроцентрала, ќе беше многу полесно. Се плашам дека ситуацијата ќе се повтори и оваа зима и дека ќе увезуваме скапа електрична енергија. Можеби граѓаните нема да ја плаќаат директно преку сметките, но тоа ќе оди преку буџетот на државата, кој ќе се празни непредвидено, а државата ќе се задолжува уште повеќе и ќе има помали капитални инвестиции“, вели професорот Цицонков.

Според него, и топланите се најдоа во многу незгодна ситуација. Но тој никако не ја поддржува идејата за греење на мазут.

„Цената на гасот знаеме дека се менува, може да порасне доста високо и во таков случај од ЕСМ, кое работи со топланите, најавуваат дека наместо гас, ќе користат нафта, бидејќи нафтата би била поевтина. Јас, како експерт, имам негативен став кон тоа решение, ако цената на гасот е висока, да користат нафта. Значи, тоа не треба да дојде предвид воопшто, затоа што топланите се наоѓаат во густо населено подрачје во градот и ќе има големо загадување ако работат на нафта. Во близината има и многу училишта, не само станбени објекти. Затоа, тоа решение не треба воопшто да се земе предвид, освен ако станува збор за некоја виша сила, на пример ако секне доводот на природен гас, па само во таков случај топланите да се приклучат на нафта или на мазут, и тоа само неколку дена“, вели професорот Цицонков.

Целиот разговор со универзитетскиот професор погледнете го во видеото.