.webp){kind=icon}
Германскиот канцелар Олаф Шолц рече дека Германија треба да го зголеми темпото на ширење на обновливите извори на енергија за да ја постигне својата цел да стане климатски неутрална до 2045 година, дури и додека најголемата европска економија добро го поднесува првичното влијание на енергетскиот притисок од намалувањето на испораките од Русија.
„Ќе ја поминеме оваа зима без недостиг од гас“, рече Шолц вчера на отворањето на терминалот за течен природен гас во Лубмин, на балтичкиот брег, пренесува новинската агенција ДПА. Тој додаде и дека нема економска криза во Германија.
„За долгорочна транзиција од јаглен, нафта и природен гас, Германија треба да го зголеми своето производство на електрична енергија за една третина до 2030 година, а потоа да го удвои во следната деценија“, рече Шолц во интервју за берлинскиот весник „Тагесцајтунг“, објавено вчера.
„Ако сакаме да постигнеме енергетска транзиција, потребна ни е поголема брзина. Целта треба да биде да се поставуваат три-четири големи турбини на ветер во Германија секој ден“, рече Шолц.
Енергијата доминираше во првата година од функционерскиот мандат на Шолц. Но кревката енергетска безбедност на Германија беше откриена кога Русија ги намали своите испораки во знак за одмазда поради поддршката на Берлин за Украина по почетокот на руската инвазија.
Течниот природен гас помогна да се намали јазот во испораките и резервите. Лубмин е вториот терминал што се отвора, а ќе следуваат уште во текот на оваа година. Енергетскиот притисок ја принуди Германија да го продолжи работниот век на преостанатите нуклеарни електроцентрали во земјата, но Шолц рече дека реакторите дефинитивно ќе се затворат напролет. Шолц напомена и дека голем број закони биле променети токму за да се забрзаат одобрувањата за проекти за електрична енергија од ветер, што, според сегашната законска регулатива, може да трае и до шест години.
„Се соочуваме со најголемата индустриска модернизација во Германија од крајот на 19 век. Никој не треба да ја потценува оваа задача“, рече Шолц во интервјуто за весникот.
