.webp){kind=icon}
Владата разработува нов модел на прогресивно даночење по домаќинство, наместо по физичко лице. Во разговор за емисијата „Zoom in“ (Зум ин) на ТВ Блумберг Адрија, заменик министерот за финансии, Филип Николоски рече дека новиот концепт е тема на дебата и треба етапно да се воведе во 2023 година. Според него, Владата нема да се откаже од прогресивен данок затоа што тој ќе обезбеди поголема правичност.
„Новиот Концепт на даночна реформа треба да доведе до праведност, ефикасност, ефективност и транспареност. Во таа насока, а тоа произлезе и од дебата, е и укинувањето на постојниот модел на прогресивно оданочување, за кој и анализите покажаа дека не дава вистински резултати и не е правичен модел. Го укинуваме, но не се откажуваме од прогресијата. Работиме на нов модел кој ќе биде во насока да се опфатат сите приходи во едно домаќинство“, рече заменик-министерот за финансии.
Прочитајте повеќе: Ковачевски: Треба да продолжи дискусијата за прогресивно оданочување
Тој објасни и зошто претходниот модел не беше правичен и не можеше да ја постигне целта.
„Има семејства со четворица возрасни каде што само еден од нив е вработен и има плата од над 100.000 денари и со тој модел ова лице ќе подлежи на прогресивно оданочување. Меѓутоа, може да се случи во едно семејство да има четири лица што се полнолетни, работат и имаат плата од 80.000 денари. Во тој случај никој од нив не би подлежел, според постојниот модел, на прогресивно оданочување и тоа не е фер. Нашата цел е да работиме на модел каде што ќе има фер и правичен систем и каде што ќе се опфатат лицата на ниво на семеен буџет“, вели Николоски.
Во однос на иницијативата за воведување данок на екстра профит, рече дека воведување ваков данок во време на криза не е новина и дека таков данок веќе имаат воведено и други земји.
„Во време на криза одредени компании од различни индустрии како резултат на инфлацијата, растот на цената остварија екстра профит и се размислува да се воведе данок на екстра профит со времен карактер. Тоа не е новина, ваков данок имаат воведено Хрватска и некои други земји“, посочи заменик-министерот за финансии Филип Николоски во интервјуто.
