.webp){kind=icon}
Во овој момент во светот, па и во Македонија, го живееме најтешкиот период за работа по Втората светска војна. Стопанството се соочува со намалување на приходите и раст на трошоците по повеќе основи, а во исто време и сѐ поголем е бројот на компании каде што расходите ги надминуваат приходите, изјави за Блумберг Адрија ТВ Орце Симов од Сојузот на стопански комори.
Како што нагласи тој, повеќе фактори го отежнуваат работењето на компаниите, од кои како најголеми може да се издвојат високата цена на енергентите, пред сѐ на струјата и природниот гас, високата инфлација, нарушениот глобален синџир на снабдување и недостигот од квалификувана работна сила.
„Пред пандемијата на ковид, па и во 2020 и 2021 година, цената на електричната енергија во просек беше под 40 евра за мегават-час, додека сега е зголемена речиси за 10 пати . Тоа е нешто што не може да се планира, да се предвиди и да го издржи македонската економија“, категоричен е Симов.
Инфлацијата исто така е голем проблем за стопанството.
„На почетокот се говореше дека тоа е транзиторна инфлација, која се појавува поради тоа што по ковид-кризата, завршија рестрикциите и почна да расте побарувачката, но се покажа дека се задржа подолго, а беше подгреана и од енергетската криза, така што инфлацијата ја намалува куповната моќ на граѓаните, ги троши резервите на компаниите и го отежнува планирањето на нивните бизнис-операции“, вели Симов.
Целиот разговор со него погледнете го на видеото во рамките на објавата.
