Индексот на трошоците на животот во април 2026 година, во однос на април 2025 година, бележи зголемување од 5,7 проценти, а индексот на цените на мало бележи зголемување од 5.0 проценти, соопшти Државниот завод за статистика. Статистичките податоци само ги потврдија стравувањата дека војната на Блискиот Исток ќе се почувствува и во Македонија главно преку растот на цените на нафтените деривати и следствено на повеќето производи и услуги.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Предизвици за индустријата за спортска опрема: Индивидуални победници наместо колективен успех
Затворањето на продавниците на „Хервис“ во Хрватска, Словенија и Германија не помина незабележано. Австрискиот синџир за спортска облека „Хервис“ ги затвора сите продавници во Хрватска, Словенија и Германија, а новите сопственици планираат да се фокусираат исклучиво на австрискиот пазар. Веста доаѓа во време кога пошироката индустрија за спортска опрема се соочува со голем број предизвици, што јасно се одразува во движењата на акциите на водечките компании.
На секторско ниво, аналитичарите предупредуваат дека по речиси две децении силен раст, се забележува забавување. Според проценките, индустријата, која расте во просек од околу 9 проценти годишно од 2007 година, би можела да расте само за 4 до 5 проценти во иднина. Овој пресврт доаѓа откако долгогодишниот тренд на „casualization”, т.е. потрошувачи кои се префрлаат на патики и спортска облека во секојдневни ситуации, достигна позрела фаза. Иако побарувачката за спортски обувки останува присутна, секторот се движи со побавно темпо од средината на 2023 година, без јасни знаци за посилно закрепнување на краток рок.
Војната со Иран ѝ оди во прилог на американската индустрија за природен гас
Катар, мала држава во Персискиот Залив, во 1996 година ја натоварил на огромен танкер првата пратка течен природен гас (ЛНГ) наменета за електроцентрала во Јапонија. Следната година испловил и првиот товар за Европа. Во трите децении што следуваа, катарската државна енергетска компанија „Катар енерџи ЛНГ“ (QatarEnergy LNG) продолжи да снабдува со течен гас купувачи во повеќе од дваесет земји, од Белгија до Бангладеш, без ниту еднаш да го прекине извозот на ова суперладно гориво, кое се транспортира во течна состојба и има клучна улога на енергетскиот пазар. Сè досега.
Покрај највидливите последици од војната на американскиот претседател Доналд Трамп со Иран - човечки жртви, геополитичка неизвесност и нагли промени на цените на нафтата - проширувањето на конфликтот на Блискиот Исток ја доведува во прашање тешко стекнатата репутација на „Катар енерџи ЛНГ“ како најсигурен снабдувач на најбрзорастечкото фосилно гориво во светот. Дури и ако нарушувањето биде краткотрајно, увозниците на гас сфаќаат дека можеби премногу лесно сметале на сигурноста на Катар. Сега забрзано бараат алтернативи и подготвуваат резервни планови, кои најчесто значат повеќе договори со САД.
Народна банка: Инфлација од 4 проценти и раст на БДП од 3,5 проценти во 2026.
Се очекува раст на БДП од 3,5 проценти во 2026 година и негово забрзување до 3,8 проценти во 2027 година. Притоа главен двигател и натаму ќе бидат инвестициите, особено јавните инфраструктурни проекти, како и постепеното закрепнување на надворешната побарувачка. Ова го истакна вчера на прес-конференција гувернерот Трајко Славески. Тој информира дека Советот на Народната банка ги разгледал и ги усвоил најновите макроекономски проекции, содржани во кварталниот извештај на Народната банка.
Во извештајот е заклучено дека светската економија и понатаму се соочува со значителни ризици. По растот од 3,4 проценти во 2025 година, се очекува умерено забавување на светскиот раст, кој би се свел на 3,1 проценти во 2026 година, а светската инфлација е нагорно ревидирана. Главниот извор на неизвесност и натаму се геополитичките конфликти, особено ескалирањето на состојбата на Блискиот Исток, што значително влијае врз цените на примарните производи и трговските текови.
РКЕ најавува ревизија на тарифните блокови во сметките за струја
Новиот претседател на Регулаторната комисија за енергетика (РКЕ), Ацо Ристов, најавува анализа на четирите тарифни блока во сметките за потрошена електрична енергија за корисниците на регулираниот пазар и порачува дека според него нелогично е да се плаќаат четири цени за ист берзански производ.
„Мој личен став е дека се треба да се отвори и ова прашање ќе го разгледаме во наредниот период дали да има блокови или не или поинаку да се димензионираат. Ќе напраиме анализа од досегашното искуство бидејќи веќе неколку години функционираат блоковите и е важечко решение. Воедно, од искуствата од регионот ќе видиме како може да се направи нешто и дали може да се направи нешто подобро во интерес на крајните потрошувачи“, изјави Ристов. Можно е, најави, да направиме некаков нов начин, кој ќе биде поправичен.
Акциите на „Хокај 360“ скокнаа за 30 проценти по ИПО од 416 милиони долари
Акциите на „Хокај 360“ (Hawkeye 360 Inc) скокнаа за 30 проценти откако давателот на сателитски сигнали за разузнавање за американските владини агенции собра 416 милиони долари на првичната јавна понуда (ИПО) во САД, со цена на врвот од маркетиншкиот опсег. Акциите на компанијата со седиште во Херндон, Вирџинија, се отворија по 33,80 долари во четвртокот во Њујорк, во споредба со нејзината ИПО цена од 26 долари за акција. Понудата од 16 милиони акции беше пласирана на пазарот во опсег од 24 до 26 долари за секоја.
Тргувањето ѝ дава на компанијата пазарна вредност од 3,1 милијарди долари, врз основа на акциите во оптек наведени во нејзините поднесоци. Основана во 2015 година, „Хокај 360“ произведува, поседува и управува со констелација од повеќе од 30 сателити кои слушаат радио сигнали од емитери како што се радари, уреди за блокирање и сателитски телефони и користи свои алгоритми за обработка на сигнали за обработка на класифицирани податоци за американската влада.
.webp){kind=icon}
