Синдикатот на УПОЗ е незадоволен и бара повлекување на новиот закон за плати, бидејќи смета дека со него се кратат правата на вработените во администрацијата. Покрај суштинските спорни одредби во законот, за синдикалците е спорно и тоа што Владата го донела законот без претходна консултација со синдикатите, како засегнати страни.
„Владата во последните неколку закони што се многу важни за работниците решава да не ги вклучи синдикатите и сама да ги направи законите, а потоа да ги објави на ЕНЕР за потоа да се даваат предлози и забелешки. Тоа не е социјален дијалог, тоа е демонстрација на сила и моќ. Што се однесува до суштината на законот, самиот е противуставен и не е компатибилен со другите закони. Противуставен е поради тоа што во Уставот стои дека платите се утврдуваат со закон или колективен договор, а тука се вели дека се враќаат правилниците на голема врата и преку правилници ќе се определуваат плати, а сите колективни договори што нема да бидат согласни со овој системски закон ќе бидат надвор од сила, односно ќе бидат прогласени за неважечки“, вели Трпе Деаноски, претседател на Синдикат на УПОЗ при Сојузот на синдикати на Македонија.
Тој во разговор за Блумберг Адрија ТВ вели дека има многу нејасни работи во врска со овој закон и не знаат како ќе се исправи ситуацијата.
„Ако се донесе овој закон, платата ќе ја утврдува Министерството за финансии. Ако не биде повлечен законот, ќе има голем револт. Веќе ни недостигаат голем број работници, без разлика дали станува збор за администрација, здравство, полиција, одбрана... Имаме некои нови пресметки дека ни недостигаат над 1.000 доктори, недостигаат многу голем број медицински сестри, недостигаат административци на високи и раководни позиции, бидејќи моментално платата во јавниот сектор е доста ниска и не е конкурентна со приватниот сектор. Имаме многу заминувања од јавен во приватен сектор. Луѓето земаат и неплатен одмор за да работат сезонски во странските туристички места, особено на Јадранот“, објаснува Деаноски.
Синдикалците ќе бараат средби со Владата, но веќе имаат закажано состаноци и со различни синдикати за да се координираат како ќе настапат во наредниот период во врска со овој закон.
Целиот разговор со претседателот на УПОЗ погледнете го во видеото.
.webp){kind=icon}
