Просечната месечна исплатена нето-плата по вработен, во ноември 2022 година, изнесува 33.011 денари, што е зголемување за 13,3 проценти во однос на истиот месец претходната година, покажуваат податоците што денеска ги објави Државниот завод за статистика. Сепак, поради високата инфлација во овој период реалната нето плата бележи пад од 5,2 проценти.
Забележително е и дека просечната плата во ноември, минатата година бележи и благо намалување во однос на претходниот месец кога изнесувала 33.104 денари.
Инаку, ДЗС соопшти дека номиналното зголемување на просечната плата во ноември се должи, пред сѐ, на зголемувањето на просечната месечна исплатена нето-плата по вработен во секторите: трговија на големо и трговија на мало, поправка на моторни возила и мотоцикли (18,7 проценти), објекти за сместување и сервисни дејности со храна (17,5 проценти) и административни и помошни услужни дејности (17,3 проценти).
Намалување на просечната месечна исплатена нето-плата по вработен, во однос на претходниот месец, е забележано во секторите: снабдување со електрична енергија, гас, пареа и климатизација (4,5 проценти), објекти за сместување и сервисни дејности со храна (3,5 проценти) и уметност, забава и рекреација (3,1 процент).
.webp){kind=icon}
