Инфлацијата во Македонија до крајот на годината ќе изнесува 9,7 отсто, а не седум како што прогнозира власта со ребалансот на буџетот. Најновата анализа на институтот на економски истражувања Finance Think (ФТ), која се однесува на податоците за првиот квартал од оваа година, покажува дека растот ќе биде побавен, а цените ќе растат побрзо.
Влошените прогнози се должат на неизвеснота што ја носи руската инвазија на Украина.
„Изгледите за растот на европскиот континент се влошија, а интензитетот на конфликтот укажува на подолготрајност на ценовните притисоци во споредба со првичните прогнози. Оттука, Finance Think надолно ја ревидира проекцијата за растот на БДП во 2022 на 2.8%, додека годишната инфлација се проектира на 9.7%“, пишува во анализата.
Во однос на растот на БДП од 2,4 отсто во првиот квартал од оваа година, ФТ анализира дека е остварен на ниска споредбена основа од истиот период лани, но е сличен на динамиката од 2021 година, укажувајќи на понатамошна умерена пост-пандемиска консолидација на економските текови.
„Најголем раст во првите три месеци од 11,2 отсто бележат секторите трговија, транспорт и хотелиерство, кои беа најизложени на затварањата на економијата во текот на пандемијата. Кај останатите сектори, растот е стагнантен, што е особено забележливо кај земјоделството (0.3 отсто) и преработувачката индустрија (0.2 отсто), додека градежништвото забележа значителен пад од 17.2 отсто. Растот на извозот и увозот забрза, на 11.1% и 24.4%, соодветно, што е одраз на олабавувањето на тесните грла во глобалните синџири на снабдување од почетокот на годината, а пред Руската инвазија врз Украина. Бруто инвестициите (38.6%) бележат значајно понатамошно закрепнување. Стабилизацијата на пазарот на труд и растот на платите ја поддржаа приватната потрошувачка (4.9%), додека јавната потрошувачка (0.5%) во овој квартал одразува фискална консолидација при реализација на иницијално планираниот буџетски дефицит во износ од 19.9%“, пишува во Макроекономскиот монитор на Finance Think.
Институтот преупредува дека во пост – ковид периодот дошло до натамошно пасивизирање на населението. Па така, иако невработеноста во перидот јануари – март бележи намалување на 14,8 отсто споредено со претходните 15,2 отсто, се намалува и вработеноста и тоа од 47.3 на 47.1 отсто. Стапката на активност за овој период се намалила од 55,7 на 55,3 осто.
.webp){kind=icon}
