Доколку увозната цена на електричната енергија е пониска од онаа што се произведува во ТЕЦ „Неготино“, ќе биде донесена одлука оваа термоцентрала да престане со работа, уверува министерот за економија Крешник Бектеши.
„Ако ЕСМ ни достави податоци дека производствената цена на ТЕЦ 'Неготино' е повисока од увозната цена на електричната енергија, насоката на Владата ќе биде ТЕЦ 'Неготино' да не работи и да се увезува електрична енергија што ќе биде поевтина“, изјави Бектеши по денешната средба со тимот од Македонската енергетска асоцијација.
Такви податоци, како што рече, моментално немаат добиено од ЕСМ, но вети дека уште денеска ќе контактираат со оваа енергетска компанија.
„Секогаш ќе ја одбираме најевтината варијанта. Ќе ги намалиме сите трошоци на електрична енергија од страна на сите енергетски компании со цел да ги намалиме трошоците за граѓаните и за стопанството и на таков начин да влијаеме врз животниот стандард на граѓаните и нашето стопанство да биде поконкурентно“, рече Бектеши.
Она што е значајно, според него, е тоа што, по 15 години, првпат во јануари имаме над 80 проценти домашно производство на електрична енергија.
„Ова покажува дека сите институции ја завршиле својата работа и дека справувањето со енергетската криза е успешно“, констатира Бектеши.
За повлекувањето струја од страна на ЕСМ во јануари, Бектеши рече дека се повлечени 820 мегавати електрична енергија, но дека ја немаат точната сума. Фактурата до МЕПСО, како што рече, треба да стигне до крајот на февруари.
Во однос на мерењата за загадувањето на воздухот поради користењето на мазутот за производство на електрична енергија, Бектеши рече дека Министерството за економија не располага со вакви податоци и упати на Министерството за животна средина и просторно планирање и Инспекторатот за животна средина.
.webp){kind=icon}
