Замрзнувањето на цените не е пазарна мерка, а ако Владата сака да интервенира за да го заштити населението, треба да ги активира стоковните резерви, кои секогаш во ваква ситуација се покажуваат како подобар механизам, изјави денеска извршниот директор на Стопанската комора, Антони Пешев.
Според Пешев, економиите во светот имаат поинаков пристап и проблемот не го решаваат со замрзнување на цените. Подобро е, како што рече тој, да се субвенционира делот од населението на кое навистина му е потребно тоа, но и да се помогне со директно намалување на царините, со помош при увозот на репроматеријали, со субвенционирање електрична енергија, со механизми што го прават домашното производство поконкурентно.
Depositphotos
„Владата посегна по оваа мерка сакајќи да го намали притисокот на населението што се најде во економски проблеми, но јас мислам, а и вие слушнавте, дека сите економии во светот малку поинаку му приоѓаат на проблемот. Ние се залагаме токму за тој принцип - да не одиме со замрзнување на цените, туку со субвенционирање на она население на кое навистина му треба тоа. Замрзнувањето на цените непотребно ги става компаниите чии производи се замрзнати во неповолна економска позиција, а производите им се продаваат и на оние групи население на кои таа разлика во цена не им значи ништо. Затоа, многу повеќе ги почитуваме мерките на Владата што се однесуваат на директна интервенција во делот на намалување на царините, помош при увозот на репроматеријали, субвенционирање електрична енергија и механизмите што го прават домашното производство поконкурентно, отколку директно замрзнување на цените“, напомена Пешев, одговарајќи на новинарски прашања пред Македонско-австриските бизнис-средби во Комората.
Замрзнување на цените, како што нагласи тој, е мерка што не може да трае долго, а по нејзиното завршување повторно ќе има поскапувања.
„Оваа мерка не може да трае долго и по нејзиното завршување повторно ќе го имаме проблемот со зголемување на цените. Во меѓувреме, пак, компаниите чии производи биле опфатени со замрзнувањето на цените изгубиле многу пари. Затоа ние секогаш се залагаме за пазарни, а не за популистички мерки“, подвлече извршниот директор.
На прашањето дали за ова комуницирале со Владата, тој одговори потврдно.
„Да, апсолутно. Се појавивме со неколку изјави, но Владата има право да ги замрзне цените. Сепак, повторно ќе напоменеме, има механизми што не се доволно искористени, а тоа се државните резерви, кои секогаш во ваква ситуација се покажуваат како подобар механизам од замрзнувањето на цените. Владата би требало, ако сака да интервенира, да го засили влијанието на пазарот со свое влегување преку 'базенот' што се вика државни резерви“, подвлече Пешев.
.webp){kind=icon}
