.webp){kind=icon}
Македонците си ги исплатија давачките кон државата за годинава - и тоа го сторија до 3 април. На тој ден во четвртиот месец всушност е таканаречениот ден на даночна слобода (tax freedom day). Тоа е реален ден, но имагинарна граница што практично означува до кога во годината вработените работат за државата, а од кога почнуваат да работат за себе, се разбира само на хартија. Тоа се пресметува врз основа на процентот од бруто-платата што секој вработен го плаќа за даноци и за социјални придонеси. Значи, годинава за државата сме работеле 93 дена.
Според пресметката на аналитичкиот тим на „Блумберг Адрија“, Македонците всушност први се раздолжуваат кон ненаситниот државен апарат, па Босанците, кои го сториле тоа на 23 мај. Просечниот Србин се раздолжил на 8 јуни, а Хрватите на 11 јуни. Тоа допрва ќе им следува на Словенците, кои за државата ќе треба да работат дури до 5 јули годинава.
Во Соединетите Американски Држави, денот на даночната слобода во 2023 година веќе пристигна на 18 април, додека во Европската Унија обично доаѓа подоцна - на 11 јуни.
Наплата на даноци и придонеси
Македонија предвиде во буџетот за годинава да собере вкупно 250.689 милиони денари како даночни приходи и придонеси. Сумата е за 13 отсто повисока од буџетските приходи што беа предвидени за лани со ребалансот на буџетот.
Сепак многу поважни од проекциите се бројките за реализација на овие приходи. Од даночните приходи и придонеси дo април се реализирани 30,5 проценти.
Како што веќе пишувавме, загрижува наплатата на данокот за додадена вредност (ДДВ), што укажува најверојатно на потребата од ребаланс.
До април се наплатени и третина од платените придонеси.
Просечната месечна исплатена бруто-плата по вработен во март 2023 година изнесува 52.318 денари, додека нето-платата е 34.925 денари.
