.webp){kind=icon}
Нарачките во мај во Германија се намалиле за 10 отсто во споредба со истиот месец во 2022 година, се наведува во соопштението на ВДМА (VDMA) со седиште во Франкфурт.
Извештајот дава првично навестување за слабостите откако земјата претрпе рецесија на почетокот од оваа година. Тоа ќе кулминира со објавувањето на бројките за индустриското производство в петок, кои може да покажат дека растот запира во мај, по малото зголемување претходниот месец. Кај нас во мај индустријата конечно забележа раст, но тоа не значи дека не постојат други ризици за економијата.
Ова се петте вести што треба да ги знаете за почеток на овој ден.
Станбени кредити најмногу користат граѓани со плата над 50.000 денари
Над половина од граѓаните што користат станбен кредит имаат плата од над 50.000 денари, се наведува во последниот извештај на Народната банка. Оние, пак, со плати до 30.000 денари најмногу користат потрошувачки кредити и кредитни картички.
„Кај кредитите за набавка на станбен простор највисоко учество имаат кредитокорисниците со повисок месечен доход ‒ месечни примања над 50.000 денари (52,6 проценти). Од друга страна, населението со понизок доход (со месечни примања до 30.000 денари), кое се смета и како финансиски поранливо, особено во услови на засилување на инфлацијата, има претежно учество во структурата на кредитирањето на физичките лица за финансирање потрошувачка, со учество во потрошувачките кредити од 52,6 проценти, а во дозволените пречекорувања и кредитни картички од 57,5 проценти“, укажуваат од Народната банка.
Забрзан раст на пролонгираните кредити кај македонските банки
Забрзува растот на пролонгираните кредити, што може да биде потенцијален извор на ризик, укажува Народната банка во извештајот за ризиците во банкарскиот сектор за 2022 година. Во него се истакнува дека ризикот е особено изразен доколку пролонгирањето се користи како начин за олеснување на должничкиот товар на компаниите што немаат одржливи оперативни парични текови или имаат тешкотии во задржувањето на својата конкурентска способност на пазарот.
„Така, вкупните пролонгирани кредити лани пораснаа за 16,7 проценти, односно за 2,3 милијарди денари (37,9 милиони евра), што е повеќе од двојно поголем раст во споредба со 2021 година (6,9 проценти, односно за 896 милиони денари) или околу 14,5 милиони евра)“, информираат од Народната банка.
Народна банка: Нова мерка за јакнење на отпорноста на банките
Во вакви услови на зголемување на ризиците, Советот на Народната банка донесе уште една мерка за јакнење на отпорноста на банките. „Од 1 јули следната година ќе се зголеми стапката на противцикличниот заштитен слој на капиталот за изложеностите на домашните банки за 0,25 процентни поени, од претходно утврдените 0,75 проценти на еден процент“, соопшти Народната банка.
„Зголемувањето на стапката на противцикличниот заштитен слој на капиталот има цел да дејствува превентивно и да води кон натамошно зајакнување на капиталната позиција на банките, земајќи ги предвид тековните макроекономски услови и движењата на пазарот на недвижности. Оваа мерка е во согласност со мерките што се преземаат во поголем број земји во Европската Унија, со кои се бара повисока адекватност на капиталот на банките како заштита од можните ризици од опкружувањето“, велат од банката.
Прв позначаен раст на индустријата по пауза од една година
Индустриското производство во мај годинава, во однос на мај лани, е зголемено за 6.1 отсто. Во периодот јануари – мај, пак, во споредба со минатата година, растот изнесува еден процент, соопшти Државниот завод за статистика.
Ова е прв повисок раст на индустриското производство по една година. Од почетокот на 2023 година индустријата или беше во минус или покажуваше раст од нешто над еден отсто.
Саудиска Арабија и во август ќе произведува помалку нафта
Саудиска Арабија ќе го продолжи едностраното намалување на производството за еден месец, со што ќе го ограничи снабдувањето со енергeнтот и покрај очекуваното затегнување на пазарот. Вредноста на суровата нафта во Лондон по оваа информација забележа раст од два отсто.
Намалувањето на производството за еден милион барели дневно што започна овој месец, а кое се надоврзува на постојните ограничувања воведени од ОПЕК+, ќе продолжи во август и може да трае подолго, се наведува во соопштението на саудиската државна новинска агенција „Сауди прес“. Со оваа мерка ќе се намали саудиското производство на околу девет милиони барели дневно, што е најниско ниво во последните неколку години, поради што ќе се намали и обемот на продажба.
