За пет месеци 25 вонредни настани регистрирани на македонските пруги

Во првите пет месеци од годинава на македонските пруги се регистритран 25 вонредни настани, при што загинале пет лица, а 20 се повредени. Последниот се случил на пред неколку дена кога на железничкиот патен премин кај кумановско Романовце се судрија локомотива и патничко моторно возило и беше повредено едно лице.

Непочитувањето на сигналните знаци на патните премини на пругите од учесниците во патниот сообраќај, движењето по пругите и качувањата на вагоните од трети лица (мигранти и други лица), но и неисправната сигнализација се клучните причини за несреќите.

Од извештаите на ЈП ЖРСМ за претходната година биле регистрирани:

• 39 вонредни настани со усмртени девет лица, а осум повредени
• Оштетени се четири моторни возила на ЈП ЖРСМ
• Сообраќајот бил во прекин вкупно 374 часа
• Две од сериозните несреќи се случиле на патен премин, а седум во движење на возови.
• Единаесет од несреќите се поради излизгување на воз од шините, три се на патен премин, а четири при движење на железничките возила.

Во ниеден случај од наведените вонредни настани нема одговорност ЈП инфраструктура при ЖРСМ, велат од претпријатието. Оттаму потенцираат дека преземаат повеќе мерки за подобрување на безбедноста на железничкиот сообраќај.

„Редовно се врши одржување на пругите од страна на нашиот стручен персонал. На 15 јули годинава од страна на изведувачот СТРАБАГ е завршен ремонтот на пругата од Ногаевци до Неготино .На делот од пругата Табановци-Куманово постоечките изолирани отсеци се заменети со бројачи на осовини на возовите што представува највисок степен на контрола на движењето на возовите. Во станицата Трубарево направена е надградба на софтерот за телекоманда кој служи за далечинско управување на сообраќајот на пругата Табановци-Гевгелија. “ велат од претпријатието.

 

Но покрај причините што ги наведува претпријатието за несреќите, проблем е и неисправната сигнализација вели Тони Димовски, претседател на Независниот синдикат во МЖ Транспорт и претставник на машинскиот персонал во ова претпријатие.

„Речиси 80 проценти од Табановце до Гевгелија сигнализацијата не во ред. Цело време работиме со јавување на телефон во телекоманда, не водат со телефон, цело време поминуваме на црвени сигнали во договор со колегите што не следат од телекоманда. Исто така не им се исправни патните премини и треба да ги направат, а пругата е со бавни возења. Да си ги направат сигналите и да ги избришат, бидејќи не се гледаат, со прашина се, не се избришани долги години, светат, но од далеку не се забележува дали е зелен, црвен или жолт сигнал, а ние работиме според нив“  вели Димовски

Ги потенцира и случаите со качувања на лица на вагони, претежно во станицата во Илинден каде возат товарни возови со нафта, а што вели дека се прави за кражби и за снимање на видеа за социјални мрежи.

Со Предлог законот за изменување и дополнување на законот за железнички систем, што по скратена постапка, е на дневен ред на 120 седница на Собранието, во членот 16 стои дека се овозможува јавниот железнички превоз на патници и стока да се врши од приватно домашно или странско правно лице, т.е. се отвора пазарот за други железнички превозници.

Според податоците на Секретаријатот на Транспортната заедница, 59 отсто  од сите несреќи на патните премини во Западен Балкан резултираат со смртни последици или тешки поврeди.Во државава се изградени 595 километри пруга со вкупно 240 патни премини како потенцијални фактори за настанување на сообраќајни несреќи.

Во моментов нема коментари за веста. Биди прв да коментира...

Остави коментар