Државното друштво „Номагас“ има нов сопственик

Владата ѝ ја предала сопственоста на „Номагас“, националната компанија за пренос на гас на Министерството за економија. Промената веќе е запишана од страна на Централниот депозитар за хартии од вредност, па Министерството сега целосно го поседува ова акционерско друштво.

Се тврди дека преносот на сопственоста е во согласност со Законот за енергетика, иако „Номагас“ беше формирано пред само осум месеци, а произлезе од спојувањето на Националните енергетски ресурси (НЕР) и ГА-МА, гасоводната компанија што Владата ја откупи од „Макпетрол“. Тогаш целосен сопственик беше Владата, исто како што го поседуваше и НЕР пред спојувањето.

Во времето на формирањето основната главнина на друштвото беше нешто над 58,3 милиони евра. 

Во јуни годинава сепак основната главнина беше зголемена со издавање 33.108 обични акции со номинална вредност од 100 евра за акција по пат на приватна понуда-втора емисија. Со оваа емисија основната главнина на друштвото изнесува 61,7 милион евра. Дополнителните 33 милиони евра што ги вшприца Владата всушност беа наменети за тековни активности на „Номагас“ поврзани со трошоците за експропријација, кои ова друштво ги има за реализација на проектите на гасификацијата во земјава.

„Номагас“ стопанисува и оперира со целата преносна мрежа во државата, вклучувајќи ги и интерконекциските водови кон соседните држави.

Најавите беа дека до крајот на оваа година треба да се пуштат во употреба новите делници до Гостивар и до Битола со преносната мрежа, со што ќе се покријат околу 70 проценти од вкупното население во државата. Во наредниот период, пак, треба да се изградат и интерконекциските водови до Грција, Србија, Косово и до Албанија.

Досега се изградени 96 километри од националниот гасовод, а 178 километри се во изградба.

Во моментов нема коментари за веста. Биди прв да коментира...

Остави коментар