.webp){kind=icon}
Бензинот еуросупер БС-95 да поевтини за 2,5 денари по литар, еуросуперот БС-98 да поевтини за три денари, а да нема промени на цените на еуродизелот (Д-Е V) и на екстра лесното масло за домаќинство (ЕЛ-1), одлучи денеска Регулаторната комисија за енергетика.
Од полноќ, литар еуросупер БС-95 ќе се продава по цена од 83,50 денари, а 85,5 денари ќе чини еуросуперот БС - 98. Цената на еуродизелот БС (Д-Е V) останува 86 денари за литар, со што ова гориво стана поскапо од бензините. Цената на екстра лесно маслото за горење екстра лесно 1 (ЕЛ-1) и понатаму ќе биде 85 денари за литар.
За 1,691 денар се намалува и цената на мазутот М-1 НС и килограм ќе чини 46,976 денари.
Со одлуката на РКЕ се врши намалување на малопродажните цени на нафтените деривати во просек за 1,95 проценти во однос на одлуката од 2-ри месецов.
РКЕ информира дека референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 6,215 проценти, кај дизелот за 1,205 проценти, кај екстра лесното масло има намалување за 1,350 проценти, а кај мазутот намалувањето е за 4,990 проценти. Курсот на денарот во однос на доларот во изминатиот период по кој беа формирани цените со претходната пресметка е повисок за 0,546 проценти.
