.webp){kind=icon}
Царинските службеници на граничниот премин Ќафасан спречиле обид за шверц на 50 тони дизел гориво декларирано како базно масло, а кое било транспортирано во две товарни моторни возила цистерни. Против сторителите се поднесени кривични пријави до Јавното обвинителство, соопштуваат од Царинската управа.
„На влез во државата, на граничниот премин Ќафасан, пристигнале две товарни возила со цистерни што се пријавиле за транзит. Испраќач на стоката е фирма од Албанија, а примач фирма од Република Северна Македонија. Поради сомневање во поднесената документација и видот на декларираната стока, товарните моторни возила се задржани за понатамошна контрола. Притоа се земени и мостри за лабораториско испитување“, се наведува во соопштението на Царинската управа.
Царинска управа
Од добиените резултати од лабораториската анализа, како и од извозните документи добиени во соработка со албанската царинска администрација, е констатирано дека во двете товарни моторни возила цистерни, наместо декларираното базно масло, има дизел гориво за кое увозните давачки во Република Северна Македонија се поголеми, односно дека е направен обид за избегнување давачки во поголем износ при увоз на акцизна стока.
Вредноста на вкупното количество на дизел горивото во двете цистерни изнесува 3.121.626 денари, за што царинските давачки изнесуваат 1.745.327 денари.
Царинска управа
Возилата и горивото се привремено одземени и против сторителите се поведени соодветни судски постапки за кривично дело царинска измама по членот 278а од Кривичниот закон.
