.webp){kind=icon}
Над 560 милиони евра се обезбедени за реализација на проекти во железничката инфраструктура. Половина милион евра ќе се инвестираат во реализација на третата фаза од железничката пруга на коридорот 8 кон Република Бугарија, а 7,5 милиони евра за изградба на заеднички железнички премин на Табановце.
Парите за реализација на проектите се обезбедени преку Европската инвестициска банка, Европската банка за обнова и развој, Инвестициската рамка за Западен Балкан – ВБИФ и од ИПА-програма. Законските решенија за реализација на овие финансиски средства вчера беа усвоени во Собранието, а денеска беа тема на средбата на министерот за финансии Фатмир Бесими со претставниците на овие две финансиски институции во земјава, Фатих Туркменоглу на ЕБОР и Габриел Бјорн на ЕИБ.
МИА
„Посветено се работи на обезбедување финансиски средства за реализација на вакви крупни инфраструктурни проекти што ќе имаат придонес во економскиот раст не само додека се одвива нивната реализација туку и долгорочно преку нивното значење во поврзувањето и олеснувањето на транспортот“, рече министерот Бесими.
За реализација на проектот за железничкиот коридор 8 - фаза 3, делница од Крива Паланка до границата со Република Бугарија се обезбедени финансиски средства во износ од 175 милиони евра од ЕБОР и 175 милиони евра од ЕИБ. За реализација на овој проект се обезбедени и 149,2 милиони евра инвестициски грант од Инвестициската рамка за Западен Балкан – ВБИФ, како и грант од ИПА 2 во износ од 60,77 милиони евра. Со овој проект целосно ќе заврши изградбата на источниот дел од железничкиот коридор 8 до границата со Република Бугарија.
Во однос на проектот за изградба на заеднички железнички премин на Табановце, со Република Србија, обезбедени се средства во износ од пет милиони од ЕБОР и 2,5 милиони евра грант од ВБИФ.
Во наредниот период се очекува да се потпишат финансиските договори со ЕИБ и ЕБОР и со ЕК за реализација на средствата.
