.webp){kind=icon}
На денешната седница на генералното собрание на Асоцијацијата на балканските комори (АБК), која се одржува во Солун, Грција, ќе биде потврден изборот на претседателот на Стопанската комора, Бранко Азески, за претседател на Асоцијацијата во следната година.
На седницата ќе се расправа и за актуелните прашања од економското опкружување на земјите од Балканот, вклучувајќи ги перспективите на балканските земји да им се приклучат на Европската Унија и на еврозоната, како и прашањето за трговската и економската интеграција на земјите од регионот.
Главниот фокус во периодот на претседателството на Асоцијацијата на балканските комори под водство на Азески следната година ќе бидат инфраструктурата и поврзаноста помеѓу балканските земји, но и соработката на тој план со меѓународните финансиски организации.
МИА
АБК е здружение на 10-те стопански комори од Балканскиот Регион (членки и нечленки на Европската Унија), кое следната година одбележува 30 години од своето постоење. Целта на Асоцијацијата е создавање интеграција и развој на стопанската соработка во регионот.
Членки на АБК, покрај Стопанската комора на Северна Македонија, се и Стопанската комора на Албанија, Стопанската комора на Бугарија, Надворешнотрговската комора на БиХ, Стопанската комора на Црна Гора, Унијата на трговско-индустриските комори на Грција, Стопанската комора на Кипар, Стопанската комора на Романија, Стопанската комора на Србија и Унијата на комори и стоковни берзи на Турција.
