.webp){kind=icon}
Тендерот за изградба на хидроцентралата Чебрен пропадна, бидејќи на грчката фирма „Архидром“ на 31 декември ѝ истекла банкарската гаранција, а нова не е доставена. Банкарската гаранција од 1,4 милиони евра од Архиродон нема да се активира.
ППЦ-Архиродон на 14 септември 2023 година беше избран за најповолен понудувач на 14. тендер за изградба на реверзибилната хидроцентрала ПАХЕ „Чебрен“. Подоцна имаше забелешки на јавниот повик и до крајот на 2023 година требаше да одлучи дали ќе продолжи со проектот информираше министерката за животна средина, Каја Шукова.
„Од грчката фирма беше побарано да се потпише договор за заедничко вложување со Електрани на Северна Македонија (ЕСМ) за да можат да ја продолжат банкарската гаранција. Ние тоа барање не го прифативме и ги информиравме за тоа, но одговор не добивме. Со тоа, сега ќе доставиме информација до Владата да се поништи постапката“, рече Шукова.
МИА
Владата на 14 септември на 185-тата седница донесе одлука со која се овозможи реализација на хидроцентралата Чебрен, со проценетата вредност на инвестицијата од околу една милијарда евра. Со одлуката е предвидена изградба на реверзибилна хидроцентрала со инсталиран капацитет од најмалку 333 мегавати. Предвидено е Чебрен да има функција на производство на електрична енергија, како и режим на пумпање и враќање на водата назад со што на Црна Река е предвидено создавање на ново вештачко езеро.
По завршување на проектирањето, и обезбедувањето на потребните документи се очекува да се почне со градба која е предвидена да трае седум години. Идејата и проектирањето за големиот хидроенергетскиот проект Чебрен започнува со првите физибилити студии во 60-тите години од минатиот век. Досега имало 13 неуспешни тендери во период од последните 20 години, а последниот јавен повик, пред тековниот, е објавен во 2016 година.
