Просечната месечна исплатена нето-плата по вработен во ноември 2023 година изнесува 38.359 денари, што е намалување во однос на октомври кога таа изнесуваше 38.843 денари. Сепак, во однос на истиот месец претходната година, просечната плата во ноември бележи зголемување за 16,2 проценти.
Според Државниот завод за статистика, ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: јавна управа и одбрана и задолжително социјално осигурување (23,8 проценти), снабдување со електрична енергија, гас, пареа и климатизација (22 проценти), снабдување со вода, отстранување на отпадни води, управување со отпад и дејности за санација на околината (19,4 проценти).
Намалување на просечната месечна исплатена нето-плата по вработен, во однос на претходниот месец, е забележано во секторите: дејности во врска со недвижен имот (8 проценти), рударство и вадење на камен (5,9 проценти), финансиски дејности и дејности на осигурување (4,6 проценти).
Аналитичкиот тим на „Блумберг Адрија“ очекува платите и понатаму да растат.
„Со раст на платите од 16,2 проценти на годишно ниво во ноември 2023 година, продолжи трендот на подобрување на куповната моќ (+12,7 проценти на годишно ниво во реални услови), бидејќи платите растат побрзо од инфлацијата веќе 8-ми месец во ред. Генерално, платите ќе продолжат да растат во наредниот период.“, велат од нашиот аналитички тим.
Според нив, инфлаторната епизода продолжува да влијае на барањата на вработените за повисоки плати, а од март годинава се очекува зголемување на минималната плата од 11,5 проценти.
„Фактор кој добива се поголемо значење во движењето на платите е мобилноста на работната сила. Од една страна, Западот оди кон либерализација на приемот на работна сила, додека иницијативата Отворен Балкан предвидува слободно движење на работната сила веќе во март годинава. Ова ќе изврши дополнителен притисок врз платите на работниците, што ќе ја забрза конвергенцијата кон повисоките плати што ги нудат другите пазари.“, велат од нашиот аналитички тим.
.webp){kind=icon}
Во моментов нема коментари за веста. Биди прв да коментира...