.webp){kind=icon}
Превозниците што вршат патнички товарен транспорт и од Министерството за транспорт и врски имаат сертификат за професионален возач може да извадат патна исправа приоритетно и по редовна цена. Владата на седница донесе одлука по иницијативата од здружението на транспортери да се забрза процесот за добивање пасош.
Постапката за пријавување ќе се извршува преку здруженијата и асоцијациите на транспортери, со што листите со професионални возачи ќе се достават до Министерството за транспорт и врски, кое ќе ја проверува валидноста на сертификатите, а понатаму ќе се проследуваат до Министерството за внатрешни работи.
МИА
„Наоѓаме решение како влада за издавање патни исправи по брза лента со цел да ѝ излеземе во пресрет на оваа многу значајна дејност за државата, имајќи предвид дека околу 90 проценти од транспортот на товар во државата се врши по патниот сообраќај. Од транспортниот сектор многу зависи домашната економија и затоа сакаме да овозможиме транспортот да не трпи поради состојбата што во моментов ја имаме со патните исправи. Очекувам за десетина дена да биде завршена процедурата од започнување до издавање на патната исправа на возачите“, вели министерот за транспорт Благој Бочварски.
Во земјава има околу 16.000 возачи со сертификат за професионален возач издаден од Министерството за транспорт и врски. Според здруженијата на транспортери, околу 120 возачи во моментов немаат патни исправи.
