Трошоците на животот во мај 2024 година во однос на мај 2023 година бележат зголемување од 4,5, а цените на мало бележат зголемување од 5,8 проценти, соопшти Државниот завод за статистика (ДЗС).
„Инфлацијата мерена преку индексот на трошоците на животот во мај 2024 година, во однос на април 2024 година, изнесува 0,9 проценти“, информира ДЗС.
Зголемувањето на инфлацијата во мај 2024 година, во однос на април 2024 година, е резултат на зголемувањето на трошоците на животот во следните групи: ресторани и хотели за 3,1 отсто, рекреација и култура за 2,1 отсто, транспорт за 1,9 отсто, облека и обувки за 1,5 отсто, мебел, покуќнина и одржување на домаќинствата за 1,0 отсто, храна и безалкохолни пијалаци за 0,7 отсто, разновидни стоки и услуги за 0,4 отсто домување, вода, електрика, гас и други горива, здравје за 0,1 отсто
Во мај 2024 година, во однос на април 2024 година, намалување на трошоците на животот е забележано кај комуникациите за 0,3 отсто.
Трошоците на животот во групите: алкохолни пијалаци, тутун и наркотици и образование остануваат на исто ниво како и во претходниот месец.
Македонската редакција на „Блумберг Адрија“ веќе пишуваше дека тврдокорната инфлација ќе ја мачи македонската економија и во следниот период. Два месеци со ред беше позиционирана на четири отсто, а во мај стапката забрзала на 4,5 отсто. Според проекциите на НБРМ враќање на целта од два отсто може да се очекува во 2026 година.
Според експертите има повеќе причини зошто инфлацијата во земјава е повисока од таа во еврозоната, но главни се ограничената конкуренција на домашниот пазар и несоодветната регулаторна политика.
Инфлацијата во еврозоната во мај беше повисока од очекувањата, но сепак е на ниво кое не ја одврати Европската централна банка (ЕЦБ) да почне со олеснување на монетарните услови, па на состанокот во четвртокот за прв пат во пет години изврши намалување на основната камата за 25 базични поени. Во мај, во монетарната унија беше измерена инфлација од 2,6 отсто на годишно ниво. Еден месец претходно таа изнесуваше 2,4 отсто.
Народната банка ќе има состанок на Комитетот за оперативна монетарна политика во вторник.
.webp){kind=icon}
