Две аукции за државни обврзници во вторник: Владата бара 26 милиони евра

Преку две нови аукции за државни хартии од вредност, Министерството за финансии во вторник ќе се задолжи со нови 26 милиони евра.

Според проспектот објавен на веб-страницата на Министерството, првата аукција е за тригодишни државни обврзници на износ од 1,2 милијарда денари (19,5 милиони евра), со камата од 3,950 отсто.

Втората аукција е за 15-годишни обврзници на износ од 400 милиони денари (6,5 милиони евра), со каматна стапка од 5,60 отсто.

Ова е второ задолжување месецов по основ на државни хартии од вредност. На аукциите одржани на 3 септември државата запиша 65 милиони евра.

Веќе следниот ден, в среда, државата треба да исплати достасани обврски во висина од близу 14 милиони евра по основ на претходно одржани аукции. Ова ќе биде последната исплата во текот на третиот квартал од 2024 година.

Но најголемите обврски достасуваат во последниот квартал од годината. Во периодот од октомври до декември за наплата достасуваат претходно запишани хартии од вредност во висина од 287,5 милиони евра.

Освен со државни хартии од вредност, државата е во процес на задолжување и кон Унгарија со кредит во висина од 500 милиони евра.

Овие задолжувања новата влада ги вкалкулира во ребалансот на буџетот за годинава, па дефицитот за до крајот на годината е испланиран на близу 727 милиони евра или 182 милиони повеќе од проекцијата во буџетот за годинава. Како процент од БДП, дефицитот од претходно планираните 3,4 ќе се искачи на 4,9 отсто.

Во моментов нема коментари за веста. Биди прв да коментира...

Остави коментар