.webp){kind=icon}
Има четири прашања за кои реалниот сектор бара одговор пред да се пристапи кон расправа за нацрт-концептот за даночните реформи, вели Бранко Азески, претседателот на Стопанската комора во соопштение до медиумите, а откако до комората стасал нацрт-концептот за даночни реформи.
Првото прашање, според Азески е поврзано со инфлацијата.
„Поради инфлаторните движења, каматните стапки од ден на ден се зголемуваат на финансиските пазари. Република Северна Македонија пред неколку месеци упати барање за задолжување преку еврообврзница и барање до Меѓународниот монетарен фонд за користење линија за претпазливост и за ликвидност. До денес на бизнисот сѐ уште не му е познато до каде се постапките во врска со овие аранжмани за прибавување ликвидни средства, кои денес чинат многу повеќе, вели тој.
Прашува и што е со барањата и со предлозите на Стопанската комора на Северна Македонија кои во форма на иницијатива од МЕА ѝ беа понудени на државата како излезни решенија од енергетската криза. Предлозите, како што вели, биле конкретно наменети за компаниите, за стопанството, и барале итна и одлучна реакција на носителите на економската политика за спас на реалниот сектор, кој според него е единствен кој создава додадена вредност во државата. Вели и дека тоа прашање е во многу голема корелација со прашањето за новите даноци.
„Трето, нели е нормално во нацрт-концепт за даночни реформи да се предвидат и прецизни рокови и услови на кои ќе се обврзе државата за понуда на поквалитетни услуги спрема приватниот сектор; рокови за дигитализација на нејзините процеси, за укинување на парафискалните давачки, како и за намалување на сивата економија и на корупцијата? Односно бизнисот очекува понуда на пинг-понг решение, што значи дека пред државата да одлучи да ги зголеми даноците треба да им докаже на даночните обврзници дека е ефикасна, ефективна, транспарентна и дека нуди квалитетни услуги. Низ овие прашања може да се види зошто на нашата држава ѝ е потребен рамковен економски договор, за кој Собранието на СКСМ, како највисок орган на најстарата и најмоќна бизнис-асоцијација во земјава, со усвојувањето на Декларацијата за општествен консензус за економски реформи, политики и мерки, повикува на консензус и на поддршка од сите субјекти во државава за нејзино што поскоро применување, како прв чекор кон нова страница во развојот на македонската економија за општо добро на сите граѓани на земјата, вели Азески.
Додава и дека Декларацијата за општествен консензус за економски реформи, политики и мерки, усвоена точно на денот на 100-годишнината од коморското организирање во земјава, досега ја потпишале и целосно се согласиле со нејзиниот текст 133 компании и 3 институции (МАНУ, Универзитетот „Американ колеџ – Скопје“ и Организацијата на работодавачи на Македонија), а активностите на тој план продолжувале и натаму.
