.webp){kind=icon}
Владата работи на тоа да обезбеди доволни количини струја по прифатливи цени за компаниите. Министерот за економија, Крешник Бектеши, на денешната средба со претседателот на Стопанската Комора на Македонија, Бранко Азески и претставници на 10 компании најголеми потрошувачи на електрична енергија рече дека освен со Бугарија и Грција, земјава преговара и со Србија и Албанија за ублажување на последиците од енергетската криза. Министерот потенцираше дека регионалниот пристап е најдобриот начин за справување со една од најтешките зими кои не очекуваат не само нас туку и цела Европа.
„Работиме да им обезбедиме на компаниите доволни количини на електрична енергија, а со преговорите кои што интензивно ги водиме правиме максимални напори цената на електричната енергија да биде порационална од онаа што е на светските берзи. Во изминатиот период сме во директни преговори со Србија и со Албанија, во рамки на Отворен Балкан, а изминатиот период владина делегација предводена од премиерот Ковачевки беше во Софија и Атина со што веќе имаме договори за обезбедување на суровини за зголемување на домашното производство како и дополнителни количини на електрична енергија“, изјави Бектеши.
На работната средба како што информираше министерот Бектеши и претседателот на Комората Азески е договорено компаниите да достават конкретни предлози до Владата кои ќе бидат инкорпорирани во новиот пакет мерки за поддршка на домаќинствата и стопанството кои се подготвуваат и ќе бидат објавени до крајот на месецот.
„ЕСМ ќе ги покрива целосно потребите за електрична енергија за домаќинствата и за микро и малите компании кои се на регулиран пазар, а ние се обидуваме со обезбедување на дополнителни количини на електрична енергија да им излеземе во пресрет на големите компании кои се на отворен пазар или околу 1.500 фирми кои се од огромно значење за економијата“ кажа Бектеши.
Претседателот на Стопанската комора на Северна Македонија Бранко Азески истакна дека соработката со Владата во последните месеци е на највисоко ниво, а суштината е да се помогне таму каде е тоа најпотребно.
