.webp){kind=icon}
Пред нас е клучната недела. Потребна е целосна мобилизација за соочување со реалноста, а таа е дека струјата на берза се продава по 512 евра за мегават час, пишува во денешната колумна Бранко Азески, претседател на најголемата комора во земјава.
Од утре Стопанската комора ќе се координира и во четврток ќе има нова средба со министерот за финансии за да се разглед тешката состојба во која се наоѓа стопанството речиси цела година, а мерки за поддршка се уште нема.
Затоа, Азески потсетува дека од вкупниот број вработени во земјава близу 600.000 работат во приватниот сектори својата егзистенција ја обезбедуваат во бизнисот.
Според него, 30 години државата е во стагнација затоа што се обидува да ги реши наметнатите прашања за името, јазикот и црквата. Сега кога тие прашања се решени „ние имаме една опција, да ги засукаме ракавите, да се обединиме и да работиме“.
„Нам во овој момент ни треба самодоверба затоа што оваа битка може да ја добијат само луѓе што ја сакаат татковината, што имаат срце и многу знаење, а ако такви немаме треба да си „купиме“ од странство затоа што за жал светот така функционира. Сега нам ни треба најдобрите претставници на бизнисот да седат на седниците на Владата и Парламентот каде се носат крупните одлуки, наши и владини претставници заеднички да одат во САД и Германија, заедно да побараме помош од нашите стратешки партнери за градба на енергетски објекти што ќе го намалат овој диспаритет, наместо да ги броиме неуспешните тендери кои достигнуваат двоцифрени бројки“, напиша Азески.
Тој потсетува на поразителните факти – дека годишниот раст на македонската економија од 1993 до лани е разочарувачки и просечно изнесува 1,7 отсто . Образованието не е реформирано во изминатите три децении и не продуцира кадри кои ќе одговараат на бизнисот. Ваквите состојби, според Комората, се должат на не функционирањето на правната држава и на доминација на партиските над државните интереси. Друг дебакал на државата е тоа што троши милијарда евра за субвенции во земјоделството без да создаде додадена вредност и без визија, па годинава Македонија ќе увезе храна за 700 милиони евра што е причина за високата инфлација.
Состанокот закажан а в четврток е прв по одморите. Последниот состанок се одржа пред еден месец. Тогаш бизнисот ги изнесе своите барања пред надлежните, а тие изјавија дека сите предлози се прифатливи. Во меѓувреме, цените на струјата стигнаа на историски највисоко ниво и компаниите потсетуваат дека ако и натаму нема државна интервенција ќе мора да го намалат производството и да отпуштат работници.
