Храната за три месеци поскапела за 18 проценти

Цените на храната во вториот квартал на 2022 година забележаа годишен раст од 18 проценти (10,4 проценти во претходниот квартал), покажуваат податоците на народната банка објавени во новиот квартален извештај.

„Притисоците од растот на увозните цени беа делумно ублажени преку донесените државни мерки во почетокот на март 2022 година за основните прехранбени производи, со намалување на повластената стапка на ДДВ од 5 на 0 проценти и замрзнување на трговските маржи на овие производи, коишто важеа до крајот на мај, а во јуни беше донесена дополнителна одлука во однос на трговските маржи на основните прехранбени производи. Од аспект на структурата, годишниот раст кај цените на храната главно произлегува од зголемените цени на лебот и житата, зеленчукот, месото, млекото, сирењето и јајцата, коишто сочинуваат малку повеќе од три четвртини од порастот на цените на прехранбената компонента“, информираат од Народната банка.

Оттаму објаснуваат дека растот на домашните цени на храната е во согласност со ценовните движења на основните прехранбени производи на меѓународниот пазар.

„Поточно, повисоките цени на житните производи се главно одраз на високиот раст на цените на житарките на светските берзи, при отежнато производство и извоз од Украина поради војната. Постојаните прекини во однос на синџирите на снабдување, придружени со поскапување на сточната храна за добитокот доведоа до двоцифрен пораст на цената на месото. Исто така, растот на цените на нафтата и вештачките ѓубрива ги зголемија транспортните трошоци и трошоците за земјоделски влезни компоненти, а со тоа и цените на земјоделските производи“, велат од Народната банка.

Од централната банка додаваат дека во вториот квартал од 2022 година, странските ефективни цени на храната и натаму бележат забрзан раст, при истовремено натамошно забрзување на растот и на продажните цени на домашните производители на храна.

Во моментов нема коментари за веста. Биди прв да коментира...

Остави коментар