Паѓа бројот на говеда и овци во Македонија, расте бројот на свињи

Значително намалување на добиточниот фонд во Македонија во изминативе пет години откриваат новите податоците на Државниот завод за статистика, што е значително изразено кај бројот на говеда и овци. Имено, на крајот од 2023 година во земјава имало 149.000 грла говеда, што е за 69.000 грла помалку отколку во 2019 година. Во истиот период, бројот на овци се намалил за 98.000 грла. Исклучок од овој негативен тренд е свињарството, каде минатата година се забележува пораст на бројот на грла во однос на изминатите години.

„Блумберг Адрија“ веќе пишуваше дека високите трошоци, климатските промени, конкуренцијата од увезените производи и ниските откупни цени се дел од предизвиците на македонските сточари. Еден од главните фактори што влијаат на моменталната состојба во сточарството е социоекономскиот аспект, кој се манифестира со намалување на руралната популација, а со тоа и на работната сила во сточарството. Миграцијата село-град, пак, не дава надеж дека во скоро време оваа состојба ќе се промени на подобро,

„Покрај миграцијата, за жал, присутни се и нарушените синџири на снабдување на линија производител-откупувач-преработувач-трговец за сметка на примарното производство, што имаше и сè уште има значајно влијание врз динамика на напуштање на секторот. Ниските откупни цени на примарните производи, поттикнати од настојувањата за поголем профит кај наведените последователни учесници во синџирот од откупот до продажбата на мало, ја намалуваат понудата. Така се доаѓа до сè поголема увозна зависност од одредени животински производи. Дури и површна анализа укажува на голема увозна зависност кај некои видови месо“, изјави тогаш универзитетскиот професор Владимир Џабирски.

Аналитичарите на „Блумберг Адрија“ во недоамнешната анализа на месната индустрија во регионот констатираа дека поради ваквите трендови Македонија се прехранува со месо од увоз и тоа најмногу од Бразил.

Во моментов нема коментари за веста. Биди прв да коментира...

Остави коментар