Близу 70.000 работници не зеле ноемвриска плата навреме

На 87 отсто од вработените во земјава навреме им е исплатена плата и им се уплатени социјалните придонеси, соопшти Управата за јавни приходи.

Според нивната статистика, во однос на бруто – плата за месец ноември 2024 година, 70.650 работодавци имале обврска да исплатат плати и социјални придонеси за 552.030 вработени лица.

„Во законскиот рок до 16 декември, 49.911 или 71 отсто од работодавците ја исполниле обврската и исплатиле бруто плати и социјални придонеси за 482.276 од вработените лица. Ова значи дека за 87 отсто од вработените во државата социјалните придонеси се уплатени навремено“, соопшти УЈП.

Од Управата се задоволни од овој резултат кој „покажува одговорност и посветеност на работодавците со цел исполнување на даночните обврски на време, што има директен позитивен ефект и врз социјалната сигурност на работниците“.

Што се однесува до ДДВ дури 98,7 отсто од регистрираните месечни ДДВ обврзници навремено ги поднеле даночните пријави за ноември, а 78 отсто од нив извршиле и плаќање по овој основ.

„Од вкупно 7.284 даночни обврзници, 4.025 во даночните пријави пријавиле даночен долг за ДДВ и имале обврска за уплатат 3,399,369,827 денари, од кои 70 отсто или 2.811 од даночните обврзници навремено ги исполниле своите обврски при што уплатиле 78 отсто од вкупно пријавениот долг, односно уплатиле вкупно 2,652,711,966 денари“, соопшти УЈП.

За даночните обврзници кои не ги платиле даночните обврски во законскиот рок, Управата за јавни приходи редовно постапува согласно дадените законски овластувања со мерки за глоба за неподнесена даночна пријава и присилна наплата на неплатениот даночен долг.