Македонија води кредибилни и конзистентни макроекономски политики поддржани преку долгогодишната политика на фиксен девизен курс, има подобри показатели за управуање во споредба со други земји со слични економски перформанси, како и посветеност на реформи во рамки на процесот на пристапување во ЕУ.
Ова, како што соопштија од Министерството за финансии, го констатира кредитната агенција „Фич“ (Fitch Raitnigs) во последниот извештај со кој земјава го задржа кредитниот рејтинг ББ+ со стабилен изглед.
Агенцијата нотира дека минатата година реалниот раст на БДП достигнал 2,8 отсто и покрај надворешните потешкотии и дека е над проекциите заради силната јавна потрошувачка и инвестициите.
„Фич“ очекува растот на економијата во 2026 година да достигне четири отсто како резултат на реализација на инвестициите на коридорот 8 и 10д.
„Инвестициите остануваат силни, но слабиот раст на продуктивноста и неповолните демографски движења претставуваат ограничувачки фактори на растот на среден рок“, се додава во извештајот на агенција, од каде нотираат и дека се забележани силни приливи на странски директни инвестиции.
Во извештајот на „Фич“ се наведува дека во 2024 година е остварен буџетски дефицит од 4,6 отсто, што е помалку од ревидираниот со ребалансот, на ниво од 4,9 отсто, како резултат на повисоките приходи и недоволнотото извршување на капиталните расходи.
Во 2025 година „Фич“ не очекува промени кај буџетскиот дефицит заради проектираниот повисок износ на капитални расходи и нормализирање на расходите за пензиите и социјалните фондови. Позитивно влијание врз приходната страна очекува од воспоставувањето на е-фактурата.
Агенцијата смета дека грантовите од Планот за раст на Западен Балкан ќе придонесат за намалување на дефицитот на четири отсто до 2026 година.
Долгот според „Фич“ на среден рок ќе надмине ниво од 58 отсто од БДП.
Инфлацијата во 2024 година просечно е на ниво од 4,2 отсто и според „Фич“ главни двигатели се силниот раст на платите, зголемената домашна побарувачка, заедно со силниот кредитен раст на приватниот сектор.
Во однос на банкарскиот сектор, „Фич“ оценува дека тој и натаму е стабилен и профитабилен. „Банкарскиот систем е добро капитализиран, високо ликвиден и со квалитетно кредитно портфолио, при што нефункционалните кредити изнесуваат само 2,9 отсто“, се наведува во извештајот.
Кредитниот рејтинг се изготвува врз основа на анализи на политиките што ги спроведува земјата. Тој го покажува степенот на ризик од инвестирање и е еден од клучните индикатори коишто потенцијалните инвеститори ги земаат предвид при носењето на нивните одлуки.
Кредитен рејтинг за земјата изготвуваат кредитните агенции „Фич“ и Стандард и пурс“, два пати во годината.
.webp){kind=icon}
