Буџет за 2026 година: Раст од 3,8 отсто, дефицит од 3,5 отсто

Економски раст од 3,8 отсто, инфлација од 2,5 отсто и буџетски дефицит од 3,5 отсто планира Владата со предлог-буџетот за следната година

Министерката за финансии Гордана Димитриеска Кочоска соопшти дека вкупните приходи се проектирани на 374,7 милијарди денари (6,1 милијарди евра), а вкупните расходи на  413,9 милијарди денари (6,7 милијарди евра).

Дефицитот ќе изнесува 39,2 милијарди денари (637 милиони евра) што е за 0,5 п.п. помалку од оваа година. Капиталните инвестиции се планирани на пониско ниво од годинава – на 40,5 милијарди денари (650 милиони евра).

„Капиталните проекти треба да бидат главен двигател на економскиот раст до година, а позитивен раст се очекува и од приватните инвестиции со уште позабрзано темпо имајќи го предвид интересот за поволната кредитна линија за компаниите, како и приватната потрошувачка поддржана од растот на платите и пензиите“, рече Димитриеска - Кочоска. 

Според министерката, за исплата на плати проектирани се 7 отсто повеќе пари, а за пензии 9,7 отсто повеќе од годинава. Таа рече дека во март пензионерите ќе го добијат најавеното зголемување на пензиите за 1.000 денари, а растот ќе продолжи и подоцна во годината, но дали тоа ќе биде согласно законската формула или линеарно како досега, ќе одлучи владата.

Дефицитот во буџетот ќе се финансира во комбинација од домашно и странско задолжување. Најголем предизвик е исплатата на еврообврзницата од 700 милиони евра која доспева на почетокот на следната година. Во 2026 година доспеваат и уште 200 милиони евра долгови кон странство. Обврските ќе се сервисираат со нова еврообврзница од 950 милиони евра, а се планира и задолжување од околу 350 милиони евра кон странски и 400 милиони евра кон домашни банки.

Министерката нагласи дека Предлог буџетот за 2026 година ги опфаќа сите клучни политики што ќе се спроведуваат во наредниот период, со јасна цел – забрзување на економскиот раст, паралелно со постепена фискална консолидација.

Фискалната политика за 2026 година, потенцираше, ќе биде насочена кон одржување на макроекономската стабилност и поддршка на економската активност.

„Ќе продолжиме со мерки за намалување на сивата економија и зголемување на наплатата на буџетските приходи. Буџетот ќе се темели на реални проекции – приходите ќе се планираат според реалните можности, а расходите ќе бидат насочени кон стратешки приоритети. Ќе продолжи постепената фискална консолидација и дисциплинираното управување со јавните финансии, со цел поголема ефикасност и одговорност во трошењето на буџетските средства. Ќе се намалуваат несуштинските расходи, а поддршката за граѓаните и стопанството ќе се спроведува по јасни критериуми и со засилен мониторинг“, рече министерката за финансии.