.webp){kind=icon}
Јапонските сектори транспорт и угостителство се борат да најдат доволно персонал за да ги следат бранот на заздравување и растот на побарувачката од страна на туристите. Бројот на посетители се зголеми за повеќе од двојно откако Јапонија повторно ги отвори границите пред еден месец. Бројот на луѓе што работат во хотелите и гостилниците е за 30 проценти под нивото од пред пандемијата, додека авиопревозниците и организаторите на туристички автобуси известуваат за полни резервации.
Во Јапонија сега се случува тоа што се случуваше во САД и Европа во текот на летото, кога по излегувањето од пандемијата патниците ги преплавија аеродромите и туристичките агенции, кои, пак, претходно беа принудени да го намалат бројот на вработени поради долгите рестрикции во работата. Иако Јапонија не влезе во целосна изолација, пазарот на работната сила веќе беше тесен и луѓето се префрлаа на други работни позиции. Сега, со целосното отворање на границите од 11 октомври, оваа островска држава е подготвена за туристички бум, благодарение на големата побарувачка и слабиот јен, што ја прави земјата попристапна за странците.
„Ќе биде тешко да се фати такси ако странските туристи се вратат како пред пандемијата“. рече Казуки Оцука, главен извршен директор на „Даива мотор транспортејшн“, еден од најголемите превозници со такси и лимузини во земјата.
Bloomberg Mercury
Според прелиминарните бројки на Националната туристичка организација на Јапонија, околу 498.600 прекуморски патници ја посетија Јапонија во октомври. Тоа е повеќе од двојно од претходниот месец, а дури 24 пати повеќе од ланскиот октомври.
Пријавената бројка и натаму е многу помала во споредба со рекордните 32 милиони туристи што Јапонија ги пречека во врвот на туризмот, достигнат во 2019 година.
