.webp){kind=icon}
„Тошиба“ (Toshiba Corp.) планира да укине 5.000 работни места, што ќе влијае на приближно 10 отсто од јапонската работна сила, објави „Никеи“ (Nikkei). Иако земјата се бори со хроничен недостиг од работна сила, факт е дека бледнее стигмата околу давањето откази.
Покрај тоа, потегот на „Тошиба“ може да предизвика еден од најголемите бранови на отпуштања во Јапонија годинава.
Компанијата со седиште во Токио го намалува обемот на несуштинските оддели и како резултат на тоа ќе забележи еднократни трошоци од околу 100 милијарди јапонски јени (650 милиони долари).
Треба да се напомене дека Јапонија има едни од најстрогите закони за заштита на трудот во светот, па отпуштањата се ретки. Но сè поголем број јапонски компании со голема пазарна капитализација и добри финансиски резултати (англ. blue-chip компании) прибегнуваат кон отпуштања, бидејќи големиот недостиг од работна сила ја прави оваа појава помалку „непријатна“.
Синдикатите се договорија за повисоки плати, мобилноста на работниците се зголемува и повеќе компании ангажираат странски работници за да пополнат позиции во различни индустрии: од малопродажба до инженерство.
Кон средината на март најголемите јапонски компании се согласија да ги зголемат платите за 5,28 отсто во 2024 година, што е најголемото зголемување на платите во последните 33 години.
Компании како „Шисеидо“ (Shiseido Co.), „Омрон“ (Omron Corp.) и „Коника“ (Konica Minolta Inc.) исто така најавија кратења на работните места во последните месеци.
„Тошиба“ порано беше еден од најголемите работодавци во земјата, но веќе некое време се обидува да ги намали трошоците во многу сектори во кои дејствува. Компанијата се обидува повеќе да се потпре на бизнисот со недвижности и технологија. Пред да излезе на берзата во декември, компанијата се обидуваше да привлече нови инвеститори или да продаде подружници.
