„Нисан“ ќе престане да произведува комбиња и ќе крати работни места

„Нисан“ (Nissan Motor Co.) во ноември ќе престане да го произведува своето компактно комбе за да го намали вишокот производство, додека „Хонда“ (Honda Motor Co.) се подготвува да го вклучи производителот на автомобили, кој е во загуба во своето работење.

Производствената единица „Нисан Шетаи“ (Nissan Shatai Co.) не донела никакви одлуки за кратење на работните места, изјави портпаролот на „Нисан“, негирајќи го претходниот извештај на весникот „Јомиури“ (Yomiuri) дека неколку стотици работни места ќе бидат изгубени кога ќе престане производството на комбето.

Комбето сочинува околу 7.000 од вкупно 150.000 автомобили „нисан шетаи“ произведени во текот на фискалната 2023 година во фабриката „Шонан“ во Канагава. Во таа фабрика се произведува и компактното комбе „НВ200“ (NV200). „Нисан“ има удел од 50 проценти во „Нисан Шетаи“.

„Нисан“ веќе најави укинување илјадници работни места и планира да укине една петтина од својот производствен капацитет додека се бори со падот на нето-приходот од дури 94 проценти. Доведен до раб, минатата година „Нисан“ побара спас од „Хонда“, иако оттаму јасно ставија до знаење дека закрепнувањето на „Нисан“ е предуслов за каква било врска меѓу двата производитела на автомобили.

Меѓу 6.700 и 9.000 работни места ќе бидат укинати во производствените единици на „Нисан“. Во Тајланд околу 1.000 работници ќе бидат прераспределени или нивните работни позиции ќе бидат целосно укинати до есеноска, а приближно шест отсто од персоналот во северноамериканската единица поднеле барање за доброволно пензионирање. Портпаролот на „Нисан“ одби да ги коментира таквите написи во весниците.

Историскиот договор со „Хонда“, кој всушност би ги поделил јапонските производители на автомобили во две групи, го стави работењето на „Нисан“ под уште поголем надзор. Се шпекулира дека од „Хонда“ очекуваат „Нисан“ да откупи дел од акциите што ги поседува „Рено“ (Renault SA), околу 35,7 проценти од акциите, за да спречи странско влијание додека се водат преговорите.
„Хонда“ и „Нисан“ треба да ја објават рамката за преговори до крајот на месецов.

Во моментов нема коментари за веста. Биди прв да коментира...

Остави коментар