.webp){kind=icon}
Годишниот состанок на Светскиот економски форум во Давос вчера започна со предупредување од директорите на корпорациите и економистите дека годинава веројатно ќе дојде до глобална рецесија.
Од 4.410 директори анкетирани од PricewaterhouseCoopers LLP (PWC) во октомври и ноември минатата година, 73 отсто предвидуваат пад на глобалниот раст во следните 12 месеци. Прогнозите се најлоши откако оваа консултантската фирма започнала со анкети во 2011 година. Двајца од пет испитаници дури изразиле загриженост дека нивните компании можеби нема да издржат ни една деценија.
Засебно истражување на главните економисти, објавено од форумот, покажа дека две третини очекуваат светска рецесија во 2023 година, бидејќи бизнисите ги намалуваат трошоците, додека 18 отсто сметаат дека таквиот пад е „исклучително веројатен“.
Загриженоста веројатно ќе биде хајлајт за оваа недела, бидејќи повеќе од 2.700 директори, банкари и економисти се упатуваат кон швајцарскиот ски-центар Давос за првпат од јануари 2020 година. Иако најновите податоци поттикнуваат надежи дека економиите сепак ќе можат да го забават растот и да избегнат рецесија, по минатогодишниот пораст на инфлацијата и одговорот во вид на зголемување на каматните стапки од страна на централните банки многумина се подготвени за намалување на економската активност.
Претседателот на PWC, Боб Мориц, сепак, нагласи дека нивото на загриженост во истражувањето на неговата компанија е веројатно преценето.
Прочитајте повеќе: Џентилони: Европа има шанси да избегне длабока рецесија
Очекувањата за забавување се вткаени во предвидувањата, бидејќи луѓето долго време сметаа дека доаѓа забавување, рече тој. Во споредба со финансиската криза од 2008 година, газдите сега се поисплашени за економијата, но се посигурни дека нивните компании „ќе го пребродат овој пад“.
И покрај ова, довербата на деловните лидери во изгледите за раст на нивните компании падна најмногу од кризата во 2008 година.
Адаптација или смрт
Трите големи ризици за оваа година се инфлацијата, макроекономската нестабилност и геополитичките конфликти, покажа истражувањето.
Мориц од PWC вели дека главното изненадување е долгорочната перспектива, бидејќи 40 отсто од извршните директори се убедени дека „нивните организации нема да бидат економски одржливи за 10 години, освен ако не се трансформираат“.
Тој посочи: „Краткорочното се однесува на тоа како да се управува со притисокот на трошоците, а долгорочното се однесува на синџирите на снабдување, климата, технолошките проблеми“. Шефовите треба да дејствуваат сега за да „преживеат две години и да напредуваат во следните 10“ и истовремено да се уверат дека имаат капитал за распоредување во иднина.
Bloomberg
Минатата година, извршните директори беа загрижени за сајбер, здравствените и климатските закани. Мориц смета дека климатската криза останува итно прашање. „Не ме интересира што падна на листата. Работите се релативни - 60 до 70 проценти од извршните директори веќе преземаат акција“.
Геополитичките закани не се ограничени само на Русија и Кина. „Ако може да се случи Русија-Украина, што друго?“, запраша Мориц. „Што е со Блискиот Исток и улогата на Иран? Дури и американскиот Закон за намалување на инфлацијата е потенцијален ризик. Стотиците милијарди долари субвенции во рамки Законот за намалување на инфлацијата за проекти за чиста енергија предизвикуваат геополитички тензии во Европа.
Моќта е кај работниците
Во однос на вработувањата, 60 отсто од шефовите не планираат да го намалат бројот на вработени, а 80 отсто нема да го намалат надоместокот затоа што се држат до своите работници наместо да минуваат низ скапи процеси на вработување. Се очекува одливот на персонал годинава повторно да биде висок.
„Моќта е кај работниците кои ги имаат вистинските вештини“, вели Мориц.
Бизнис лидерите во Франција, Германија и Велика Британија се уште помалку оптимисти во поглед на домашниот раст.
Сепак, Британија се подобри како избрана деловна локација, при што извршните директори ја рангираа како трета најважна земја по раст на приходите, зад САД и Кина, а на исто ниво со Германија. Никогаш претходно Британија не била повисоко од четвртата позиција.
