.webp){kind=icon}
Брзата транзиција на Австралија од енергија од јаглен кон почисти алтернативи гарантира бум во проектите за батерии што можат да складираат сончева и ветерна енергија.
Земјата има најмалку 250 планирани проекти за развој на батерии, со потенцијален капацитет од речиси 130.000 мегават-часа, кој по големина е втор по Кина, според податоците собрани од „Блумберг НЕФ“ (BloombergNEF). Додека Австралија сè уште се потпира на јаглен за повеќе од половина од своето производство на електрична енергија, многу големи електроцентрали ќе бидат затворени во следната деценија.
„Управувањето со сигурен енергетски систем со ниска содржина на јаглерод значи дека складирањето енергија е императив, а инвестициите стануваат поитни како што се забрзуваат предлозите за излез од јаглен“, вели Тим Џордан, комесар на австралиската комисија за енергетски пазар и советник на владата за енергетска политика.
„Земјата треба да распореди околу 64 милијарди австралиски долари (43 милијарди американски) за да изгради доволно капацитети за складирање батерии до 2050 година“, рече тој на конференцијата во Сиднеј во вторникот. Тоа е дел од експанзијата кон чиста енергија, што може да чини дури 242 милијарди австралиски долари, а исто така вклучува и големи додатоци на соларна енергија, ветер и илјадници милји нови далноводи, како што посочи Џордан.
Комуналните претпријатија се тркаат да ги затворат старите станици за јаглен за да ги исполнат целите за декарбонизација, бидејќи поевтините обновливи извори ги прават непрофитабилни. „Ориџин“ (Origin Energy Ltd.) има намера да ја затвори електроцентралата „Ераринг“ во Нов Јужен Велс до 2025 година, додека АГЛ (AGL Energy Ltd.) ги претстави плановите за затворање за една деценија. Сите капацитети би можеле да се исклучат околу 2040 година, според главниот оператор на пазарот.
„Има навистина голем интерес, пазарот стана многу жежок во последните 12 месеци“, рече Џејмс Хардинг, извршен директор на „Генекс“ (Genex Power Ltd.), развивач на проекти, вклучувајќи и фабрика за батерии во Квинсленд. „Рударски компании, даватели на ИТ-услуги и други големи индустрии се меѓу потенцијалните купувачи што се интересираат за договори за складирање енергија“, рече тој.
„Тесла“ (Tesla Inc.) го зајакна австралискиот сектор за складирање енергија - и веројатно светската индустрија - со инсталирање на тогаш најголемата мрежа за батерии во светот во Хорнсдејл, Јужна Австралија, во 2017 година. „Тесла“ чија употреба на складиштата скокна за 64 проценти во 2022 година, сега е фокусирана на зголемување на продажбата на своите батерии „мегапак“ (Megapack) преку интернет.
„Ова е производ што ги повлекува фосилните горива електроцентрала по електроцентрала“, рече Дру Баглино, виш потпретседател за погонски системи и енергетско инженерство на компанијата, на средбата за инвеститори минатата недела. „Светскиот енергетски систем целосно ослободен од фосилни горива ќе бара складирање во батерии од околу 240 терават-часа“, изјави извршниот директор на „Тесла“, Илон Маск, на истиот настан.
Иако многу проекти во инфраструктурата за батерии во Австралија се во рана фаза на планирање и можеби нема да го завршат финансирањето или издавањето дозволи, се предвидува дека земјата ќе ги зголеми инсталациите оваа година и во 2024 година, според BNEF.
Во декември, австралиската влада понуди дури 176 милиони австралиски долари за да помогне во забрзувањето на развојот на осум големи проекти со комбинирани трошоци од околу 3 милијарди австралиски долари. Финансирањето е исто така за да се осигури дека операциите можат да ги реплицираат функциите за стабилност на мрежата што обично ги обезбедуваат постројките за гас или јаглен.
Локациите за батерии исто така генерираат повеќе приходи во Австралија и имаат корист од зголемената нестабилност на националниот пазар на електрична енергија во 2022 година, се наведува во извештајот на BNEF овој месец. Локациите за складирање поврзани со главниот национален пазар на електрична енергија генерираа 85 милиони австралиски долари со снабдување на енергетскиот пазар, што е зголемување од 12 милиони австралиски долари во претходната година. Дополнителни 80 милиони австралиски долари беа заработени преку контрола на фреквенцијата и помошни услуги.
