Џефри Гандлак од „Дабл лајн капитал“ (Doubleline Capital) за Си-ен-би-си изјави дека очекува рецесијата во САД да започне за неколку месеци и дека Федералните резерви ќе мора да реагираат „многу драматично“.
„Економските проблеми растат, за тоа зборуваме подолго време и мислам дека рецесијата ќе дојде за неколку месеци“, рече Гандлак во понеделникот. „Сè што навистина ни треба е зголемување на стапката на невработеност“.
Основачот на „Дабл лајн капитал“ исто така вели дека очекува ФЕД да ги намали каматните стапки „неколкупати“ оваа година. Целокупната состојба на економијата е „очигледно слаба“, нагласува тој.
Во понеделникот, во услови на пооптимистички изгледи за американските банки, приносите на трезорските обврзници скокнаа, а трговците со свопови се обложуваа на веројатно зголемување на стапката за четврт поен на следниот состанок на ФЕД во мај. Властите веќе една година ја заоструваат монетарната политика во борбата против инфлацијата.
Гандлак вели дека не очекува Банката на федерални резерви да ги зголеми стапките додека приносот на двегодишните обврзници не се „врати гори“, иако не прецизира за колку. Приносот се зголеми за 25 базични поени во понеделникот, поттикнат од подобреното расположение на инвеститорите, но сепак е за околу 100 базични поени понизок од почетокот на овој месец.
Ако ФЕД повторно ги зголеми стапките во мај, Гандлак вели дека разликата „помеѓу она што можете да го добиете на трезорските записи и она што можете да го добиете во банкарскиот систем ќе расте“.
Тој предупреди дека ваквото сценарио „контрапродуктивно ќе предизвика големо намалување на ликвидноста во банкарскиот систем и можеби уште некои проблеми со нереализирани загуби“.
Особено помалите банки забележаа пад на депозитите во последниве недели бидејќи клиентите ги префрлија средствата во поголеми институции, по колапсот на неколку американски заемодавци. Но банките веќе се мачеа да ги зачуваат депозитите, бидејќи зголемувањето на каматните стапки на ФЕД ги поттикна инвеститорите да ја префрлат готовината во средства со повисоки приноси, како што се трезорските записи и фондовите на пазарот на пари.
.webp){kind=icon}
